एजेन्सी । रुस र चीनबीच पावर अफ साइबेरिया २ ग्यास पाइपलाइनका बारेमा एउटा सामान्य समझदारी भएको छ ।
यो एउटा ठूलो परियोजना हो । यो सम्पन्न भएमा यसले वार्षिक ५० अर्ब घनमिटरसम्म ग्यास चीन पुर्याउनेछ ।
रुसको सरकारी समाचार संस्था आरआइए नोवोस्तीका अनुसार पुटिनका प्रेस सचिव दिमित्री पेस्कोभले पत्रकारहरूलाई केही प्राविधिक पक्षहरू सुल्झाउन बाँकी रहे पनि एउटा समझदारी बनिसकेको बताएका छन् ।
रिपोर्टहरूका अनुसार, उक्त सहमतिमा पाइपलाइनको मार्ग र निर्माण विधि समावेश छ ।
यसबारे थप विवरण वा समयतालिका भने दिइएको छैन ।
यो प्राकृतिक ग्यास पाइपलाइन सम्पन्न भएपछि रुसको यामल ग्यास क्षेत्रबाट मंगोलिया हुँदै चीनतर्फ प्रतिवर्ष ५० अर्ब घनमिटरसम्म ग्यास ढुवानी गर्ने अपेक्षा गरिएको छ । सन् २०२५ को अनुमानका आधारमा यो चीनको कुल ग्यास खपतको झण्डै १२ प्रतिशत हो ।
विभिन्न रिपोर्टका अनुसार, मूल्यमा असमझदारीका कारण यो सम्झौता वर्षौंदेखि रोकिएको थियो । तर, यसै हप्ताको सुरुमा रुसी ग्यास कम्पनी गाजप्रोम र चाइना नेशनल पेट्रोलियम कर्पोरेसनले प्रारम्भिक सम्झौतामा हस्ताक्षर गरेको समाचार आएको छ ।
रुसी अर्थतन्त्र बढ्दो दबाबमा रहेको र पश्चिमी प्रतिबन्धहरूले यसका स्रोतहरूमा क्षति पुर्याइरहेका बेला यो परियोजना रुसका लागि नयाँ महत्त्वको हुने सम्भावना छ । चीन रुसको सबैभन्दा ठूलो व्यापारिक साझेदार र तेल तथा ग्यासको सबैभन्दा ठूलो ग्राहक पनि हो ।
प्रतिक्रिया