एजेन्सी । आईसीएफ मनिटरको रिपोर्ट अनुसार, कमजोर भिसा माग, निवेदनको उच्च शुल्क र बढ्दो भिसा अस्वीकृति दरका कारण आगामी अवधिमा अस्ट्रेलियामा अन्तर्राष्ट्रिय विद्यार्थीहरूको संख्यामा थप गिरावट आउने सम्भावना छ ।
रिपोर्टका अनुसार, अस्ट्रेलियाको अन्तर्राष्ट्रिय शिक्षा क्षेत्र, विशेषगरी अंग्रेजी भाषा प्रशिक्षण र व्यावसायिक शिक्षा तथा तालिममा दबाबका विभिन्न संकेतहरू देखिएका छन् । यसले विश्वविद्यालयहरूका लागि पनि चुनौतीहरू खडा गर्नेछ । विशेषगरी चीन, भारत, नेपाल र बंगलादेश जस्ता मुख्य स्रोत बजारहरूबाट हुने आगमनमा असर पर्नेछ ।
आईसीएफ रिपोर्टले उल्लेख गरेको छ, ‘भिसाका धेरै प्रवृत्तिहरूले अस्ट्रेलियामा भविष्यको अन्तर्राष्ट्रिय भर्नाको चिन्ताजनक चित्र देखाउँछन्,’ रिपोर्टले थप भनेको छ, ‘उच्च शिक्षामा भर्ना हुनेहरू बाहेक देशमा आउने नयाँ विद्यार्थीहरूको संख्या बाहिरिने विद्यार्थीहरूको संख्याको भर्पाइ गर्न पर्याप्त छैन ।’
यो सुस्तता विगत तीन वर्षमा भएका नीतिगत कडाइहरूसँग जोडिएको छ । त्यसमा उच्च भिसा निवेदन शुल्क र विद्यार्थी आगमनमा लगाइएको कडा नियन्त्रण समावेश छ । अस्ट्रेलियाको विद्यार्थी भिसा निवेदन शुल्क २ हजार अस्ट्रेलियाली डलर पुगेको छ जसलाई विश्वकै सबैभन्दा बढी शुल्कको रूपमा वर्णन गरिएको छ ।
रिपोर्टका अनुसार, सन् २०२३ र २०२५ को बीचमा विद्यार्थी भिसा निवेदनमा ३२ प्रतिशतले गिरावट आएको छ ।
उच्च शिक्षाको क्षेत्रमा, सन् २०२४ र २०२५ को बीचमा भर्ना दर ९.७ प्रतिशतले बढेको थियो । तर, अहिले यस क्षेत्रले चीनबाट घट्दो माग र अन्य प्रमुख बजारहरूमा उच्च भिसा अस्वीकृति दरको दबाब झेलिरहेको छ ।
सन् २०२६ को सुरुतिर चीनबाट हुने निवेदनमा तीव्र गिरावट आएको छ भने भारत, नेपाल र बंगलादेशका निवेदकहरूको अस्वीकृति दर उच्च रहेको छ ।
आईसीएफ मनिटरले बढ्दो लागत र भिसा अनिश्चितताले विद्यार्थीहरूलाई निरुत्साहित गरिरहेको बताएको छ । विशेषगरी अंग्रेजी भाषा जस्ता छोटो अवधिका पाठ्यक्रमहरूका लागि आवेदन दिनेहरू निरुत्साहित भएका छन् ।
रिपोर्टका अनुसार, नीति र मागका शर्तहरूमा परिवर्तन भएन भने वर्तमान प्रवृत्ति जारी रहने सम्भावना छ । यसले आगामी वर्षहरूमा अस्ट्रेलियाको अन्तर्राष्ट्रिय शिक्षाको भविष्यप्रति चिन्ता बढाएको छ ।
प्रतिक्रिया