इरानको पुल ध्वस्त पारेपछि दंग परे ट्रम्प, सम्झौता नभएमा थप कठोर आक्रमण गर्ने चेतावनी

एजेन्सी । अमेरिकाका राष्ट्रपति डोनल्ड ट्रम्पले बिहीबार तेहरान नजिकैको एउटा राजमार्गको पुलमा भएको आक्रमणको खुसियाली मनाएका छन् । उनले सामाजिक सञ्जालमा अझ धेरै हुन बाँकी छ भन्दै चेतावनी दिएका छन् ।

अल्बोर्ज प्रान्तका उपगभर्नर गोदरातोल्लाह सेफका अनुसार, तेहरान र क्यास्पियन सागरको किनार जोड्ने बी१ पुलमा भएको सो आक्रमणमा आठजनाको मृत्यु भएको छ भने ९५ जना घाइते भएका छन् ।

अमेरिकी सेनाले उक्त पुलमा दुईपटक प्रहार गरेको र इरानको मिसाइल तथा ड्रोन बलका लागि योजनाबद्ध सैन्य आपूर्ति मार्गलाई नष्ट गरेको एक अमेरिकी सैन्य अधिकारीले बताएका छन् । परिचालन सम्बन्धी विवरणहरू साझा गर्न ती अधिकारीले नाम नखुलाउने शर्तमा कुरा गरेका थिए ।

सेफले सरकारी सञ्चारमाध्यमलाई बताएअनुसार, उक्त पुल अझै पूर्ण रूपमा सञ्चालनमा आएको थिएन र बी१ पुलमा कुनै पनि सैन्य गतिविधि भएको थिएन । उनले हताहत हुनेहरू नजिकैको गाउँका बासिन्दा भएको र उनीहरू पर्सियाली नयाँ वर्ष नौरोजको अन्तिम दिन मनाउन बाहिर वनभोज खाइरहेको बताए ।

यो पुल तेहरानलाई क्यास्पियन सागरसँग जोड्ने एक महत्त्वाकांक्षी राजमार्ग परियोजनाको हिस्सा हो जसले चालकहरूलाई घुमाउरो पहाडी सडकहरूको विकल्प प्रदान गर्छ । यो राजमार्ग व्यापारिक प्रयोजनका लागि र सप्ताहान्तको बिदा मनाउन आउजाउ गर्ने धेरै इरानीहरूले नियमित रूपमा प्रयोग गर्छन् ।

ट्रम्पले ट्रुथ सोसलमा गरेको पोस्टमा पुलमा वा नजिकै भएको विस्फोट र आकाशमा धूवाँको ठूलो मुस्लो उडेको भिडियो पनि समावेश थियो । वाशिङटनले तेहरानसँग कूटनीतिक पहल गरे पनि इरानमाथि अमेरिका र इजरायलको युद्ध पाँचौं हप्तामा प्रवेश गरेको र मत्थर हुने लक्षण नदेखिएको अवस्थामा ट्रम्पले इरानी सरकारलाई आग्रह गरे । ‘धेरै ढिलो हुनु अगावै सम्झौता गर्नुहोस्, नत्र एउटा महान् राष्ट्र बन्न सक्ने देशको केही बाँकी रहने छैन !’

इजरायली सेनाले बिहीबार पत्रकारहरूलाई जानकारी दिँदै यस आक्रमणमा आफ्नो संलग्नता नरहेको र उक्त पुल अमेरिकी निशाना भएको बताएको छ ।

इरानी नेताहरू शान्ति सम्झौतामा सहमत नभए र क्षेत्रीय तेल निर्यातका लागि महत्त्वपूर्ण जलमार्ग हर्मुज जलयोजकको सैन्य नाकाबन्दी अन्त्य नगरे इरानका सबै पावर प्लान्ट र अन्य पूर्वाधारहरू नष्ट गरिदिने ट्रम्पले धम्की दिएका छन् ।

सशस्त्र द्वन्द्व सम्बन्धी कानुनका केही विज्ञहरूका अनुसार, कुनै देशको पूर्वाधार सैन्य प्रयोजनका लागि प्रयोग गरिन्छ वा सैन्य कारबाहीमा यसको भूमिका हुन्छ भने त्यसलाई कानुनी र वैध निशाना मान्न सकिन्छ । यद्यपि, यसको वैधता प्रत्येक घटनाको प्रकृतिमा निर्भर हुन्छ ।

‘पुल वैध सैन्य उद्देश्य थियो कि थिएन भन्ने कुरा तथ्यहरूमा भर पर्छ,’ सशस्त्र द्वन्द्व सम्बन्धी कानुनका विज्ञ र पूर्व अमेरिकी राज्य विभागका वकिल ब्रायन फिनुकेनले भने जो हाल इन्टरनेशनल क्राइसिस ग्रुपमा कार्यरत छन् ।

उनले थपे, ‘मेरो बुझाइमा सो पुललाई कुनै सैन्य फाइदाका लागि नभई तेहरानलाई दबाब दिन र (सामाजिक सञ्जालका लागि) सामग्री जुटाउने आशामा निशाना बनाइएको हो ।’