अमेरिकाको तेस्रो युद्धपोत पश्चिम एसियातर्फ जाँदै

एजेन्सी । इरानविरुद्ध सैन्य कारबाही जारी रहँदा तेस्रो अमेरिकी विमानवाहक लडाकु समूह पश्चिम एसियातर्फ प्रस्थान गरिरहेको यस विषयमा जानकार एक अमेरिकी अधिकारीले बताएका छन् । जलसेनाको प्रमुख विमानवाहक जहाज मर्मतका लागि उक्त क्षेत्रबाट फर्किएपछि यो कदम चालिएको हो ।

ती अधिकारीका अनुसार, यूएसएस जर्ज एच.डब्लु. बुश मंगलबार भर्जिनियाको नोरफोकबाट अर्ले बर्क–क्लास डिस्ट्रोयरहरूको सुरक्षा घेरासहित उक्त क्षेत्रमा तैनाथीका लागि प्रस्थान गरेको छ र त्यहाँ पुग्न करिब तीन हप्ता लाग्ने सम्भावना छ । सार्वजनिक रूपमा बोल्ने अधिकार नभएका कारण ती व्यक्तिले आफ्नो नाम खुलाउन चाहेनन् ।

१३.२ अर्ब डलर लागतमा निर्मित हालसम्मकै सबैभन्दा महँगो अमेरिकी युद्धपोत यूएसएस जेराल्ड आर. फोर्डको लन्ड्री क्षेत्रमा आगलागी भएपछि युद्ध कारबाही छोड्नु परेका कारण यो नयाँ जहाजलाई पश्चिम एसिया पठाइएको हो ।

बुशको तैनाथीबारे यसअघि नै वाल स्ट्रीट जर्नलले समाचार प्रकाशित गरेको थियो ।

यो कदम यस्तो समयमा चालिएको छ जतिबेला राष्ट्रपति डोनल्ड ट्रम्प यस विनाशकारी युद्धको कूटनीतिक समाधान खोजिरहेका छन् । यस युद्धले ऊर्जाको मूल्य बढाएको छ, महत्त्वपूर्ण हर्मुज जलयोजकमा पानीजहाजको आवागमनलाई ठूलो मात्रामा रोकेको छ र खाडीका सहयोगी राष्ट्रहरूमाथि इरानको जवाफी कारबाही निम्त्याएको छ ।