२०० भन्दा बढी अमेरिकी कमान्डरहरू रहेको स्थानमा आक्रमण गरेको इरानको दाबी

एजेन्सी । इरानको इस्लामिक रिभोलुसनरी गार्ड कर्प्स (आईआरजीसी) ले आफ्नो ट्रु प्रमिस ४ अभियानको ८७औं चरणको नयाँ विवरण सार्वजनिक गरेको छ जसमा यस क्षेत्रका अमेरिकी र इजरायलसँग सम्बन्धित लक्ष्यहरू विरुद्ध समन्वयात्मक जलसैनिक आक्रमणको शृंखलाको दाबी गरिएको छ ।

एक विज्ञप्तिमा, आईआरजीसीले या अब अब्दुल्लाह अल–हुसेन कोड नाम अन्तर्गत आफ्ना जलसैनिक बलहरूद्वारा चारवटा द्रुत र सफल अपरेसनहरू सञ्चालन गरिएको बताएको छ ।

विज्ञप्ति अनुसार, आईआरजीसीका जलसैनिक एकाइहरूले मंगलबार बिहानै गुप्तचर सूचनामा आधारित र परिचालन मिसनहरू सम्पन्न गरे जसमा अमेरिकी र इजरायली कमान्डरहरू र सैन्य सामग्रीहरू भेला हुने चारवटा स्थानहरूलाई निशाना बनाइएको थियो ।

एक संयुक्त अपरेसनमा संयुक्त अरब अमिरात (यूएई) को एक शहरमा आधिकारिक सैन्य आधार बाहिर रहेको गोप्य अमेरिकी कमान्ड–एन्ड–कन्ट्रोल सेन्टरलाई सटीक निशाना लगाउने मिसाइलहरू प्रयोग गरेर नष्ट गरिएको आईआरजीसीले दाबी गरेको छ ।

विज्ञप्तिमा उक्त स्थानमा २०० भन्दा बढी अमेरिकी कमान्डर र मध्यम तहका अधिकारीहरू उपस्थित रहेको दाबी गरिएको छ ।
अर्को अपरेसनमा बहराइनमा रहेको अमेरिकी फिफ्थ फ्लीटको मुख्यालय बाहिर कमान्डरहरूले प्रयोग गर्ने लुकेको आवास स्थलमा बैठक भइरहेको समयमा ड्रोनले प्रहार गरिएको आईआरजीसीले जनाएको छ ।

घटनास्थलमा एम्बुलेन्सहरूको उपस्थिति र आवतजावतले आक्रमणको प्रभाव कति थियो भन्ने संकेत गरेको कुरा यसमा थपिएको छ ।

विज्ञप्तिमा इजरायलको स्वामित्वमा रहेको र तेस्रो देशको झण्डा प्रयोग गरिरहेको एक्सप्रेस रुम नामको कन्टेनर जहाजमा आईआरजीसी जलसैनिक बलले सटीक मिसाइल प्रहार गरेको पनि दाबी गरिएको छ ।

यसका साथै आईआरजीसीले एफ–१६ लडाकु विमानहरूलाई मार्गदर्शन गर्न प्रयोग गरिने अमेरिकाद्वारा सञ्चालित अर्ली वार्निङ रेडार सिस्टम (प्रारम्भिक चेतावनी प्रणाली) नष्ट भएको रिपोर्ट गरेको छ जुन साउदी अरबको धारान क्षेत्रको तटमा रहेको एउटा बेस बाहिर राखिएको थियो ।

आईआरजीसीले यी अपरेसनका उपलब्धिहरू हत्या गरिएका जलसैनिक कमान्डर एडमिरल अलिरेजा ताङसिरीलाई समर्पित गरिएको बताएको छ । यसका साथै आफ्ना जलसैनिक बलले उनको बाटोमा शक्ति र दृढताका साथ अगाडि बढ्ने र उनले प्रतीकात्मक रूपमा अझै पनि आफूहरूलाई मार्गदर्शन गरिरहने विश्वास व्यक्त गरेको छ ।