इरानले हर्मुज नखोले पनि युद्ध अन्त्य गर्न तयार रहेको ट्रम्पको भनाइ

एजेन्सी । अमेरिकाका राष्ट्रपति डोनल्ड ट्रम्पले आफ्ना सहयोगीहरूलाई हर्मुज जलयोजक पुनः नखोली नै युद्ध अन्त्य गर्न आफू तयार रहेको बताएका छन् ।

ट्रम्पको बारम्बारको चेतावनीका बावजुद इरानले उक्त जलमार्ग खोल्न अस्वीकार गर्दै आएको छ । अमेरिका र इजरायलले युद्ध सुरु गरेपछि पनि इरान आफ्नो अडानबाट पछि नहटेका कारण तेहरानप्रति लिइएको यो अर्को नरम अडान हो ।

वाल स्ट्रीट जर्नलको एक रिपोर्ट अनुसार, ट्रम्प र उनका सहयोगीहरूले हालैका दिनहरूमा के निष्कर्ष निकालेका छन् भने उक्त रणनीतिक नाका पुनः खोल्ने अभियानले युद्धलाई उनको प्राथमिकतामा रहेको ४ देखि ६ हप्ताको समयसीमा भन्दा बढी लम्ब्याउन सक्छ ।

रिपोर्टमा थपिएको छ– ट्रम्पले प्रमुख उद्देश्यहरूमा ध्यान केन्द्रित गर्ने निर्णय गरेका छन् । अर्थात्, सक्रिय युद्धलाई कम गर्नुअघि इरानको जलसैनिक क्षमता र मिसाइल भण्डारलाई कमजोर बनाउने र सामान्य व्यापार सुचारु गर्न तेहरानमाथि कूटनीतिक दबाब बढाउने ।

ती प्रयासहरू सफल भएनन् भने अमेरिकी अधिकारीहरूले जलयोजक पुनः खोल्नका लागि युरोप र खाडीका सहयोगी राष्ट्रहरूलाई नेतृत्व लिन आग्रह गर्ने रिपोर्टमा उल्लेख छ ।

ह्वाइट हाउसकी प्रेस सचिव क्यारोलिन लेभिटले पनि इरानमा भइरहेको सैन्य अभियानको भार साझा गर्न अरब देशहरूलाई भन्न सकिने बताएकी छन् ।

उनले भनिन्, ‘मलाई लाग्छ, राष्ट्रपतिले निकै चासो राख्ने कुरा हो । म यसमा उहाँभन्दा अगाडि बढेर केही बोल्दिनँ तर निश्चित रूपमा यो एउटा विचार हो जसको बारेमा तपाईंले उहाँबाट थप सुन्नुहुनेछ ।’

ट्रम्पले गत साता इरानलाई १० दिनको कुलिङ–अफ (सैन्य गतिविधि रोक्ने) अवधि दिएका थिए । उनले यस निर्णयलाई तेहरानबाट प्राप्त उपहारको प्रतिक्रियाको रूपमा वर्णन गरेका थिए जसअन्तर्गत इरानले आठवटा तेल ट्यांकरहरूलाई हर्मुज जलयोजक पार गर्न दिएको थियो र अमेरिकाले मुख्य ऊर्जा पूर्वाधारहरूमा गर्ने भनिएका आक्रमणहरू स्थगित गरेको थियो ।

उनले यस कदमलाई जारी कूटनीतिक प्रयासहरूमा प्रगतिको संकेतको रूपमा चित्रण गरे र इरानले अनौपचारिक माध्यमबाट थप समय मागेको कुरा पनि थपे ।