क्रिप्टोको आशा देखाएर पाकिस्तानी नेताहरूले ट्रम्पको मन जिते

एजेन्सी । जनवरी महिनामा इस्लामाबादको मुटुमा रहेको एक भव्य भवनमा पाकिस्तानका सबैभन्दा शक्तिशाली नेताहरू एक विशेष पाहुनालाई स्वागत गर्न भेला भएका थिए । अमेरिकाका राष्ट्रपति डोनल्ड ट्रम्पद्वारा सह–स्थापित क्रिप्टो प्लेटफर्म वर्ल्ड लिबर्टी फाइनान्सियलका मुख्य कार्यकारी अधिकृत ज्याकरी विट्कोफ पाकिस्तान पुगेका थिए ।

प्रतिष्ठित पाहुनाहरूको उपस्थितिले गर्दा यो कार्यक्रम कुनै ठूलो वित्तीय प्रतिबद्धता नभएको र केवल प्रारम्भिक स्वरूपको गैर–बाध्यकारी स्टेबलक्वाइन सम्झौताको समारोह भन्दा पनि कुनै राजकीय भ्रमण जस्तो देखिन्थ्यो । एउटा सामूहिक तस्बिरमा ट्रम्पका सल्लाहकार स्टिभ विट्कोफका ३२ वर्षीय छोराको एकातर्फ पाकिस्तानी प्रधानमन्त्री शहबाज सरिफ र अर्कोतर्फ देशका झन् शक्तिशाली सैन्य प्रमुख फिल्ड मार्शल असिम मुनिर उभिएको देखिन्थ्यो ।

मुनिरको अर्कोतर्फ उभिएका व्यक्ति विगत एक वर्षमा अमेरिका र पाकिस्तानबीचको सम्बन्धलाई परिवर्तन गर्न महत्वपूर्ण भूमिका खेल्ने ३५ वर्षीय बिलाल बिन साकिब थिए जसले आफूलाई क्रिप्टो ब्रो भन्ने गरेका छन् । कलेज पढ्दा शौचालय सफा गर्ने कामसहित तीनवटा काम गरेको उनी बताउँछन् ।

उक्त कार्यक्रममा साकिबले ज्याकरी विट्कोफ र वर्ल्ड लिबर्टी फाइनान्सियलका अन्य अधिकारीहरूको भ्रमणले पाकिस्तानलाई विश्व मानचित्रमा चिनाउन मद्दत गरेको भन्दै प्रशंसा गरे ।

पाकिस्तानले क्रिप्टो कूटनीति (वा साकिबको शब्दमा बिल्लोमेसी बिटकोइन र डिप्लोमेसीको संयोजक) को सिपालु प्रयोगले ट्रम्प र मुनिरबीचको फस्टाउँदो मित्रतालाई थप बलियो बनाएको छ । अमेरिकी राष्ट्रपतिको पारिवारिक व्यवसायका लागि इस्लामाबादमा गरिएको भव्य स्वागतले बढ्दो महत्वपूर्ण भूराजनीतिक सम्बन्धको गहिराइलाई उजागर गर्छ । विश्वव्यापी अर्थतन्त्रलाई उथलपुथल पार्न सक्ने युद्धमा अमेरिका र इरानबीच पाकिस्तानको प्रमुख मध्यस्थकर्ताको रूपमा उदयबाट पनि यसको पुष्टि हुन्छ ।

स्टिभ विट्कोफले गत साता पाकिस्तानले १५ बुँदे कार्ययोजना बुझाएको पुष्टि गरे र इरानलाई सम्झौता गर्न वा महत्त्वपूर्ण पूर्वाधारहरूमा आक्रमणको सामना गर्न ट्रम्पले दिएको अप्रिल ६ को समयसीमा अगाडि हुन सक्ने वार्ताका लागि इस्लामाबादलाई सम्भावित स्थानको रूपमा पनि हेरिएको छ ।

यो मुद्दा सुल्झाउनुमा पाकिस्तानको पनि आफ्नै स्वार्थ छ । इरानले हर्मुज जलयोजकबाट अधिकांश जहाजहरू पार गर्न रोक लगाएपछि पाकिस्तानले चरम ऊर्जा अभावको सामना गरिरहेको छ ।

‘ट्रम्पको ह्वाइट हाउसको नीति निर्माण प्रक्रियामा व्यक्तिगत सम्बन्ध कति महत्त्वपूर्ण हुन्छ भन्ने कुरालाई ध्यानमा राख्दा पाकिस्तानले ह्वाइट हाउसमा केही प्रभाव जमाएको हुन सक्छ जसले वाशिङटनमा मध्यस्थकर्ताको रूपमा आफूलाई प्रस्तुत गर्दा फाइदा पुर्यायो,’ वाशिङटनस्थित एटलान्टिक काउन्सिलका दक्षिण एसियाका आवासीय वरिष्ठ फेलो माइकल कुगेलम्यानले ज्याकरी विट्कोफसँगको सम्झौतालाई उद्धृत गर्दै भने ।

‘यस अपरम्परागत अमेरिकी प्रशासनमा अपरम्परागत कारकहरूले तपाईंको उद्देश्य पूरा गर्न मद्दत गर्न सक्छन् र क्रिप्टोको सन्दर्भमा पक्कै पनि त्यस्तै भएको छ ।’

गत वर्षसम्म खासै चर्चामा नरहेका साकिब अचानक पाकिस्तानका सबैभन्दा प्रभावशाली व्यक्तिहरूमध्ये एक बनेका छन् । उनले विश्वको सबैभन्दा ठूलो क्रिप्टोकरेन्सी एक्सचेन्ज बाइनान्स होल्डिङ्स लिमिटेडका अर्बपति संस्थापक चाङपेङ झाओ (सिजेड) जस्ता क्रिप्टो हस्तीहरूसँग साझेदारी गरेका छन् ।

उनले फन्ड म्यानेजर क्याथी वुड, बिटकोइन अर्बपति माइकल सेलर र सन् २०२१ मा बिटकोइनलाई कानुनी मान्यता दिने र रणनीतिक बिटकोइन रिजर्भ फन्ड स्थापना गर्ने एल साल्भाडोरका राष्ट्रपति नायिब बुकेले जस्ता व्यक्तित्वहरूसँग पनि सम्बन्ध गाँसेका छन् ।