नेपाल आएर मापसे गर्ने बिहारको सरकारी विद्यालयका शिक्षकहरू पक्राउ

एजेन्सी । शैक्षिक भ्रमणमा रहेका विद्यार्थीहरूको रेखदेख गर्ने क्रममा मदिरा सेवन गरेको आरोपमा भारतको बिहार राज्यको सुपौल जिल्लाको भारत–नेपाल सीमामा पाँचजना सरकारी विद्यालयका शिक्षकहरू पक्राउ परेका छन् ।

मधेपुरा र खगरिया जिल्लाका ती शिक्षकहरू मुख्यमन्त्री बिहार दर्शन योजना अन्तर्गत विद्यार्थीहरूसँगै नेपालबाट फर्किरहेका थिए ।

उनीहरूलाई भीमनगर नाकामा पक्राउ गरिएको थियो जहाँ अधिकारीहरूले उनीहरूको व्यवहारमा शंका लागेपछि ब्रेथलाइजर (मदिरा जाँच गर्ने मशिन) परीक्षण गर्दा उनीहरूले मदिरा सेवन गरेको पुष्टि भएको थियो ।

यस घटनालाई गम्भीरताका साथ लिँदै जिल्ला प्रशासनले ती शिक्षकहरूका विरुद्ध निलम्बनको प्रक्रिया अघि बढाएको छ ।

उनीहरूले मदिरा निषेध कानुन अन्तर्गत कानुनी कारबाही र सम्भावित पद बर्खास्तीको पनि सामना गर्नुपर्ने हुन सक्छ ।

जिल्ला मदिरा निषेध एकाइका निरीक्षक सञ्जय प्रियदर्शीले भने, ‘शिक्षकहरूको जाँच गरियो र ब्रेथलाइजर मशिन प्रयोग गरियो । मशिनको नतिजाले हामीलाई अचम्मित बनायो । पाँचैजना शिक्षकले मदिरा सेवन गरेको पाइयो ।’

प्रियदर्शीले भने, ‘पक्राउ परेका शिक्षकलाई न्यायिक हिरासतमा पठाइएको छ । बालबालिकालाई ऐतिहासिक स्थलहरूको बारेमा जानकारी दिनुको सट्टा यी शिक्षकहरूले नेपालका पहाडी भेगमा मदिरा सेवन गरे र मातेको अवस्थामा बालबालिकासँग यात्रा गरिरहेका थिए । त्यसले विद्यार्थीहरूको सुरक्षामा गम्भीर प्रश्न खडा गरेको छ ।’

मधेपुरा जिल्ला प्रशासनका एक अधिकारीले भने, ‘यी शिक्षकहरूका विरुद्ध मदिरा निषेध कानुन अन्तर्गत मुद्दा मात्र दायर गरिने छैन । उनीहरूले सेवाबाट बर्खास्तको सामना समेत गर्नुपर्ने हुन सक्छ ।’