काठमाडौं । परराष्ट्र मन्त्रालयले कन्सुलर सेवा विभागको अनलाइन दर्ता प्रणालीमार्फत हालसम्म पश्चिम एसियाबाट ८२ हजार १ सय नेपाली नागरिकले आफ्नो विवरण दर्ता गराएको जनाएको छ।
शुक्रवार मन्त्रालयमा आयोजित नियमित पत्रकार सम्मेलनमा प्रवक्ता लोकबहादुर क्षेत्रीले यस्तो जानकारी दिएका हुन्। उनका अनुसार दर्ता भएकामध्ये करिब ६ हजार जनाले सुरुमा आफूहरू असुरक्षित रहेको बताएका थिए। तर पछिल्ला दिनहरूमा असुरक्षित महसुस गर्नेहरूको संख्या उल्लेख्य रूपमा घटेको उनले बताए।
इजरायल, अमेरिका र इरानबीच बढ्दो तनावका बीच पश्चिम एसियाका विभिन्न देशहरूबाट मन्त्रालयको आपतकालीन कक्षमा हालसम्म ७८ वटा फोन कलसहित कुल १ सय ७० पटक सम्पर्क भएको पनि उनले जानकारी दिए। सुरुका दिनहरूमा अधिकांशले सुरक्षासम्बन्धी जानकारी माग्ने गरेको भए पनि अहिले भने श्रम स्वीकृतिको विषयमा जिज्ञासा आउने क्रम बढेको उनले बताए।
मन्त्रालयले आफ्ना १० वटै नियोगमार्फत समस्यामा परेका नेपालीहरूको अवस्थाबारे निरन्तर जानकारी लिँदै आवश्यक समन्वय गरिरहेको क्षेत्रीले बताए। उनका अनुसार हाल कुनै पनि नेपाली नागरिक विदेशी ट्रान्जिटमा छैनन्। जेद्दामा रहेका ५२ जना हजयात्रीहरू पनि स्वदेश फर्किसकेको उनले जानकारी दिए।
सरकार पश्चिम एसियामा रहेका नेपाली नागरिकहरूको सुरक्षाप्रति गम्भीर रहेको र आवश्यक परे उद्धारका लागि पनि तयारी अवस्थामा रहेको उनले बताए।
प्रतिक्रिया