इरानले बहादुरीका साथ गर्दैछ अमेरिका र इजरायलको सामना

एजेन्सी । इरान युद्धको छैटौं दिन झट्काहरूको दिन बनिरहेको छ ।

युद्धमैदानको स्थितिले पश्चिमी र इजरायली अनुमानहरू रणनीतिक रूपमा त्रुटिपूर्ण रहेको प्रमाणित गरेको छ । प्रतिरोधको अक्षको पतन हुनुको साटो गुणात्मक वृद्धि देखिएको छ ।

इरान र हिजबुल्लाहले भीषण आक्रमणको लय निर्धारण गरिरहेका छन् । अपरेशन एपिक फ्युरीले तेहरानको क्षमतालाई ध्वस्त पार्ने अनुमान गरेको अमेरिकाले आफ्ना रक्षा प्रणालीहरू तीनवटा अरब देशहरूमा जलिरहेको पाइरहेको छ र तेहरानको आकाशमा आफ्ना लडाकु विमानहरू गुमाइरहेको छ ।

बदलामा वाशिङटनले इरानभित्रैबाट कुर्द कार्ड खेल्ने प्रयास गरिरहेको छ र भारतमा इरानको निहत्था जहाज डुबाइदिएको छ । यसैबीच, इजरायली र विश्व अर्थतन्त्रले अर्बौंको क्षति बेहोर्दैछन् ।

इरानी इस्लामिक रिभोलुसनरी गार्ड कर्प्स (आईआरजीसी) ले पछिल्लो अमेरिकी वायु रक्षा प्रणाली थाडको रेडारका पुर्जाहरू नष्ट गरेको घोषणा गरेको छ (र उपग्रह चित्रहरूले यसलाई पुष्टि गरेका छन्) ।

जोर्डनमा रहेको मुवाफाक साल्ती एयर बेसमा रहेको (एएन/टीपीवाई–२) रेडार नष्ट भएको छ । साउदी अरबको अल–खर्जस्थित प्रिन्स सुल्तान एयर बेसमा रहेको (एएन/टीपीवाई–२) रेडार ध्वस्त भएको छ । कतारस्थित उम्म दाह्लमा रहेको (एएन÷एफपीएस–१३२) रेडार नष्ट भएको छ ।

यी ७ वटा उच्च प्रविधियुक्त रेडारहरूलाई अन्धो बनाएपछि इरानले सफलतापूर्वक हाइपरसोनिक ब्यालिस्टिक मिसाइलहरू प्रहार गरी संवेदनशील रणनीतिक लक्ष्यहरूमा आक्रमण गरेको छ । तेल अभिभस्थित रक्षा मन्त्रालयको भवन र बेन गुरियन विमानस्थललाई उसले निशाना बनाएको छ । यसले यस क्षेत्रमा अमेरिकी रक्षा कवच छिन्नभिन्न भएको प्रमाणित गर्दछ ।

लेबननी मोर्चामा अभूतपूर्व प्रदर्शन गर्दै हिजबुल्लाहले २३ वटा गुणात्मक अपरेशनहरू गरेको छ । त्यो खियाममा आमने–सामनेको लडाइँदेखि लिएर तेल अभिभको १२० किलोमिटर दक्षिणपूर्वसम्म फैलिएका थिए ।

भीषण गोलाबारी र एम्बुसका कारण इजरायली सेना ठूलो क्षति बेहोर्दै पछि हट्न बाध्य भयो । इजरायली हेलिकप्टरहरू (४ वटा उद्धार हेलिकप्टर) मृत र घाइतेहरूलाई लैजान हतारिरहेको देखिएको थियो ।

इजरायलका पूर्व प्रधानमन्त्री एहुद ओल्मर्टले हालको सरकारलाई पागल भन्दै लेबननी दलदलमा नफस्न कडा चेतावनी दिएका छन् ।

उता, अमेरिका र इजरायलले तेहरानको पूर्वाधारलाई लक्षित गरी ठूलो मात्रामा आक्रमण गरेका छन् ।

तेहरानको उत्तरमा रहेको लाभासान पहाडमा एउटा अमेरिकी एफ–१५ लडाकु विमान खसालिनुअघि फ्लेयर्स छोडिरहेको देखिएको थियो ।

अमेरिकी र इजरायली कम्ब्याट सर्च एन्ड रेस्क्यु कमान्डोहरूले पाइलटहरूलाई उद्धार गरी साउदी अरबको प्रिन्स सुल्तान एयर बेसमा लैजान सफल भए । यस घटनाले (उद्धारका बावजुद) अमेरिकी हवाई प्रभुत्वको प्रतिष्ठालाई ध्वस्त पारेको छ र इरानको आकाश घातक छ भन्ने पुष्टि गरेको छ ।

इरानी दृढताको सामना गर्न नसकेपछि वाशिङटनले वैकल्पिक योजनाहरू अपनाइरहेको छ ।

न्युयोर्क टाइम्सको खुलासा अनुसार, ट्रम्पले मसूद बर्जानी र बाफेल तालाबानीलाई अराजकता फैलाउन इराकबाट इरानमा सशस्त्र कुर्द सेना पठाउन सहयोग गर्न आग्रह गरेका छन् । सीआईएले उनीहरूलाई पहिले नै हतियार आपूर्ति गरिसकेको थियो ।

आईआरजीसीले इराकी कुर्दिस्तानमा रहेका उनीहरूको मुख्यालयमा तीनवटा मिसाइल प्रहार गर्यो र अली लारिजानीले कुनै पनि घुसपैठको प्रयासलाई कुल्चिने भनी पुष्टि गरेका छन् । बर्जानीले हतार–हतार इरानी राष्ट्रपतिलाई फोन गरेर इरानी आक्रमणबाट बच्न यस योजनाबाट आफू अलग रहेको बताएका छन् ।

अमेरिकाले भारतको तट नजिकै इरानी फ्रिगेट डुबाइदिएको छ । इरानी विदेशमन्त्रीले एक आश्चर्यजनक कुरा खुलाएका छन् । जहाज गैर–लडाकु÷औपचारिक स्थितिमा थियो, निहत्था थियो र यसमा १३० नाविकहरू थिए । यसलाई जलसैनिक युद्ध अपराध मानिएको छ जसले कडा प्रतिशोधको संकेत गर्दछ ।

अमेरिकी आणविक कमान्ड र नियन्त्रण विमान बेलायतमा अवतरण गरेको देखिएको छ । आणविक युद्ध व्यवस्थापनका लागि तोकिएको यस विमानको उपस्थिति रणनीतिक आतंकको सन्देश हो ।

कुवेतमा आफ्नै सेनाको आक्रमणबाट खसेका तीनवटा एफ–१५ई को साटो अमेरिकाले तीनवटा नयाँ लडाकु विमान पठाएको छ । हवाई ढुवानी निरन्तर जारी छ । अहिलेसम्म ४०० सैन्य उडानहरू भएका छन् ।

इजरायली अर्थ मन्त्रालयले होम फ्रन्ट कमान्डसँग गुनासो गर्दै अर्थतन्त्रले एक हप्तामै ९.५ अर्ब शेकेल गुमाएको छ । विपत्तिबाट बच्न तत्काल अर्थतन्त्र खोल्ने मागहरू दैनिक रकेट आक्रमणको वास्तविकतासँग बाझिएका छन् ।

मर्सले खाडी क्षेत्रमा जहाज ढुवानी रोकेको छ र अमेरिकी ट्रेजरी प्रतिफल ४ प्रतिशतभन्दा माथि पुगेको छ जसको अर्थ यस युद्धको खर्चले अमेरिकी ढुकुटी रित्याउन थालेको छ ।

प्रतिरोधको अक्षले अमेरिकी रक्षा कवचको प्रतिष्ठा तोडेको छ र हाइपरसोनिक हतियारले चाहेको बेला तेल अभिभमा प्रहार गर्ने क्षमता प्रमाणित गरेको छ ।

कुर्दहरू मार्फत इरानको भित्री भागमा आगो लगाउने अमेरिकी दाउ सुरुमै तुहिएको छ ।

आर्थिक रूपमा इजरायल रित्तिँदैछ, खाडीले सामुद्रिक बहिष्कार खेपिरहेको छ र अमेरिकाको गोलाबारुद सकिँदैछ ।

वाशिङटनले नेतृत्वको हत्या गरेर यो अक्ष समाप्त हुन्छ भन्ने ठानेको थियो भने छैटौं दिनले त्यसको उल्टो प्रमाणित गरेको छ ।

एफ–१५ को पतन, थाड रेडारको विनाश र लेबननमा ट्यांकहरूको विनाशले महिनौंसम्म चल्न सक्ने युद्ध हुने देखिएको छ ।

यसमा सबैभन्दा ठूलो घाटा विश्व अर्थतन्त्र र पश्चिमी सैन्य प्रविधिको प्रतिष्ठालाई हुनेछ ।