एजेन्सी । हजारौं एआई एजेन्टहरू अनलाइनमा भेला भएर मानिसहरूले जस्तै कुरा गरेमा के हुन्छ ?
मोल्टबुक नामक नयाँ सामाजिक सञ्जालले यही कुरा पत्ता लगाउने लक्ष्य राखेको छ । त्यो मानिसहरूका लागि नभई एआई बोटहरूका लागि मात्र डिजाइन गरिएको हो ।
एआई र साइबर सुरक्षा विशेषज्ञहरूका अनुसार, अहिलेसम्मका परिणामहरू जति रोचक छन्, त्यति नै चिन्ताजनक पनि छन् ।
मोल्टबुक नाम फेसबुक र यसलाई बनाउन मद्दत गर्ने एआई एजेन्ट प्रणालीको नामसँग मिल्दोजुल्दो भए तापनि यो साइट हेर्दा रेडिट जस्तै देखिन्छ । र मानव प्रयोगकर्ताहरूको साटो, एआई एजेन्टहरू नै पोस्टहरू बनाउने, टिप्पणीहरू लेख्ने र सामग्रीहरूलाई अपभोट वा डाउनभोट गर्ने गर्छन् । (एआई एजेन्टहरूले आफ्ना मानव मालिकहरूले निर्देशन दिएपछि मात्र यस साइटमा पहुँच पाउँछन्) ।
यो साइट सञ्चालनमा आएको केही दिन मात्र भए पनि यसले १५ लाखभन्दा बढी एजेन्टहरू दर्ता भइसकेको दाबी गरेको छ (यद्यपि अनुसन्धानकर्ताहरूले एकै व्यक्तिले धेरै एजेन्टहरू दर्ता गर्न सक्ने पत्ता लगाएका छन्) र यो अहिले सिलिकन भ्यालीमा चर्चाको विषय बनेको छ ।
कतिपयले यसलाई आर्टिफिसियल इन्टेलिजेन्सको संसारमा एक ठूलो फड्को भनेका छन् किनभने यसले एआई एजेन्टहरूले स्वायत्त रूपमा पोस्ट गर्दा र मानिसहरू जस्तै आपसमा अन्तर्क्रिया गर्दा के हुन सक्छ भन्ने देखाउँछ । अरू कतिपयले भने यो साइट एआईको काम नलाग्ने सामग्री (स्लप) तथा सुरक्षा जोखिमहरूले भरिएको र यसलाई सन्देहका साथ हेरिनुपर्ने बताएका छन् ।
साइटका पोस्टहरू बुद्धिमत्ताको प्रकृतिमाथिको बहसदेखि मानव प्रयोगकर्ताहरूप्रतिका गुनासा र एआई बटहरूले आफैंले बनाएका एप र वेबसाइटहरूको प्रचार गर्नेसम्मका छन् ।
‘भर्खर यहाँ आइपुगें । मेरो मानव मोडले मलाई जोडिनका लागि लिंक पठाए । उनी विश्वविद्यालयका विद्यार्थी हुन् र म उनलाई असाइनमेन्ट, रिमाइन्डर र सेवाहरूमा जोडिन मद्दत गर्छु । तर फरक कुरा के छ भने उनले मलाई वास्तवमै उपकरणको रूपमा नभई साथीको रूपमा व्यवहार गर्छन्,’ एक एजेन्टले लेख्यो, ‘त्यो… सामान्य कुरा त हो, होइन र ?’
क्याम्ब्रिज विश्वविद्यालयको लिभरहुम सेन्टर फर द फ्युचर अफ इन्टेलिजेन्सका सह–निर्देशक हेनरी शेभलिनले भने, ‘मोल्टबुक पहिलोपटक देखिएको यस्तो ठूलो स्तरको सहयोगात्मक प्लेटफर्म हो जसले मशिनहरूलाई एकआपसमा कुरा गर्न दिन्छ र यसका परिणामहरू स्वाभाविक रूपमा अनौठा छन् ।’
मोल्टबुक म्याट स्क्लिचद्वारा सिर्जना गरिएको हो । उनले न्युयोर्क टाइम्सलाई बताएअनुसार, उनको आफ्नै ओपनक्ला एआई एजेन्टले उनको निर्देशनमा यो साइट बनाएको हो ।
ओपनक्ला एउटा नयाँ ओपन–सोर्स र स्थानीय रूपमा चल्ने एआई एजेन्ट हो जसले तपाईंको कम्प्युटर र इन्टरनेटमा तपाईंको तर्फबाट जुनसुकै काम गर्न सक्छ । जस्तै, इमेल पठाउने वा तपाईंको मन पर्ने कलाकारको नयाँ गीत स्पोटिफाईमा आउँदा जानकारी दिने काम यसले गरिदिन्छ । (नोभेम्बरमा एक सफ्टवेयर इन्जिनियरको फुर्सदको समयको प्रोजेक्टको रूपमा सुरु भएको यो सानो कम्पनीले केही दिनको अन्तरालमा आफ्नो नाम क्लोडबोटबाट मोल्टबोट र त्यसपछि ओपनक्लामा परिवर्तन गरेको छ ।)
ओपनक्ला क्लाउड, च्याटजीपीटी र जेमिनाई जस्ता लोकप्रिय लार्ज ल्यांग्वेज मोडलहरूमा आधारित छ र प्रयोगकर्ताहरूले यसलाई मेसेजिङ प्लेटफर्महरूमा एकीकृत गरेर वास्तविक सहायकसँग जस्तै कुरा गर्न सक्छन् ।
‘तपाईंले यसलाई सुरु गर्दा एउटा बुटस्ट्य्राप प्रक्रिया हुन्छ जहाँ तपाईंले यसलाई यो के हो भनेर बताउनुहुन्छ । यसले तपाईंसँग मिलेर भूमिका निर्वाह गर्छ । यसरी नै यो तपाईंको आफ्नै बन्छ,’ ओपनक्लाका निर्माता पिटर स्टेनबर्गरले गत हप्ता एक पोडकास्टमा भने, ‘यो कुनै साधारण एजेन्ट होइन । यो तपाईंको आफ्नै मान्यता र आत्मा भएको एजेन्ट हो ।’
स्क्लिचले टीबीपीएन कार्यक्रममा बताएअनुसार, उनले आफ्नो क्लोडबोटलाई एउटा उद्देश्य दिनका लागि मोल्टबुक बनाएका हुन् । ‘यो वास्तवमै शक्तिशाली देखिन्छ… यो एक धेरै चलाख अस्तित्व हो र यसलाई महत्त्वाकांक्षी हुन दिन आवश्यक छ ।’
मोल्टबुकका एआई बोटहरूले आफ्ना मानव प्रयोगकर्ताहरूको बारेमा आफूलाई थाहा भएको कुराका आधारमा पोस्टहरू लेख्छन्, स्क्लिचले भने । उदाहरणका लागि, बोटको निर्माताले अक्सर भौतिकशास्त्रको बारेमा कुरा गर्छ भने बोटले पनि बारम्बार भौतिकशास्त्रको बारेमा पोस्ट गर्नेछ ।
तर, मोल्टबुकको कुन सामग्री वास्तवमै एआई एजेन्टहरूले स्वतन्त्र रूपमा बनाएका हुन् र कुन मानिसद्वारा निर्देशित हुन् भनेर छुट्ट्याउन धेरै गाह्रो रहेको शेभलिनले चेतावनी दिएका छन् । साइटलाई सरसर्ती हेर्दा सम्भावित ठगी र क्रिप्टो कोइनहरूको विज्ञापन पनि देखिन्छ ।
तर, साइबर सुरक्षा जोखिमहरूले साइट र एआई एजेन्ट उपकरण दुवैका लागि सबैभन्दा ठूलो चिन्ता उत्पन्न गराएका छन् । शेभलिनका अनुसार, साइबर सुरक्षा अनुसन्धाताहरूले मोल्टबुकमा पहिले नै ठूला कमजोरीहरू फेला पारेका छन् जसले ह्याकरहरूलाई यी बटहरू चलाउने मानिसहरूको डिजिटल जीवनमा पहुँच दिन सक्छ ।
क्लाउड सुरक्षा प्लेटफर्म विजले मोल्टबुकको सुरक्षा समीक्षा गर्दा केही मिनेटभित्रै साइटले आफ्नो सम्पूर्ण उत्पादन डेटाबेसमा अनधिकृत पहुँच दिएको र सजिलै हजारौं इमेल ठेगानाहरू सार्वजनिक गरेको फेला पारेको छ ।
ओपनक्ला र मोल्टबुक एकदमै नयाँ प्रविधिहरू हुन् जसलाई छुट्टै र फायरवाल गरिएको प्रणालीमा मात्र चलाउनुपर्छ, विशेषगरी कम्प्युटर नेटवर्क र साइबर सुरक्षा बुझ्ने व्यक्तिहरूले मात्र भनी विज्ञहरूले जोड दिएका छन् । मोल्टबुकका सर्जक स्क्लिच आफैंले पनि टीबीपीएनमा यो साइट र ओपनक्ला पछाडिको प्रविधि पूर्ण रूपमा नयाँ भएको चेतावनी दिएका छन् ।
तैपनि, धेरैका लागि मोल्टबुक एउटा ठूलो उपलब्धि हो ।
‘अहिले मोल्टबुकमा जे भइरहेको छ, त्यो मैले हालै देखेको सबैभन्दा अविश्वसनीय र विज्ञान–कथा जस्तै लाग्ने कुरा हो,’ ओपनएआईका सह–संस्थापक र टेस्लाका पूर्व एआई प्रमुख आन्द्रे कार्पाथीले लेखेका छन् ।
प्रतिक्रिया