बैंकको ऋण दुरुपयोग प्रकरण: अनिल अम्बानीको ५० अर्ब बराबरको सम्पत्ति रोक्का

एजेन्सी । भारतको आर्थिक अपराध अनुसन्धान निकाय (ईडी) ले सम्पत्ति शुद्धीकरण सम्बन्धी अनुसन्धानको क्रममा भारतीय उद्योगी अनिल अम्बानीको स्वामित्वमा रहेको रिलायन्स ग्रुपसँग सम्बन्धित करिब ५० अर्ब १३ करोड रुपैयाँ (३५०.८७ मिलियन डलर) बराबरको सम्पत्ति रोक्का गरेको छ । अनिल भारतका सबैभन्दा धनी मुकेश अम्बानीका भाइ हुन् ।

यो मुद्दा सन् २०१७ देखि २०१९ को बीचमा अनिल अम्बानीको समूहले भारतको यस बैंकबाट लिएको करिब ५६८.८६ मिलियन डलर बराबरको ऋणसँग सम्बन्धित रहेको सीएनएनले जनाएको छ । ती ऋण रकमबाट गरिएको लगानीबाट कुनै फाइदा प्राप्त भएको थिएन।

ईडीले अहिले मुम्बई, दिल्ली र चेन्नईमा रहेका आवासीय युनिट र जग्गा–जमिनमा कुनै पनि कारोबार रोक्ने निर्णय गरेको छ । यसमा उद्योगपति अनिल अम्बानीको मुम्बईस्थित पारिवारिक निवास पनि परेको स्रोतले जनाएको छ।

रिलायन्स ग्रुपले यसबारेमा टिप्पणी गर्न अस्वीकार गरेको समाचारमा उल्लेख गरिएको छ।

अनुसन्धानकर्ताहरूको भनाइ अनुसार रिलायन्स होम फाइनान्स लिमिटेड र रिलायन्स कमर्शियल फाइनान्स लिमिटेड मार्फत उठाइएको रकम ‘सुनियोजित रुपमा’प्रयोग गरी उक्त बैंकबाट लिइएका ३५० मिलियन डलर बराबरका ऋण कयौं शेल कम्पनीहरूमा (नक्कली वा कागजी कम्पनीहरूमा) सारिएको थियो।

यी ऋण रकमहरू सुरुवातमा म्युचुअल फन्डमार्फत लगानी गरिएका थिए र पछि नियम उल्लंघन गर्दै समूह–सम्बन्धित कम्पनीहरूमा पठाइएका थिए । साथै, रिलायन्स समूहका निकायहरूले ऋण स्वीकृत हुनुअघि यस बैंकका केही अधिकारीलाई घूस दिएको आरोप पनि सरकारी स्रोतको भनाइ छ ।

ईडीले यस मामिलामा कमजोर ऋणी प्रोफाइल, अभावपूर्ण कागजात र रकमको दुरुपयोग भएको प्रमाण देखिएको बताएको छ । यसमा सार्वजनिक रकमको दुरुपयोग र सम्पत्ति शुद्धीकरणको आरोप लगाइएको छ ।

संस्थाले रिलायन्स कम्युनिकेसन्स लिमिटेड र त्यसका सम्बद्ध कम्पनीहरूमाथि पनि अनुसन्धान गर्दैछ, जहाँ १.५५ अर्ब डलर बराबरको रकम लोन इभरग्रिनिङ र फण्ड रिरुटिङमार्फत नियमविपरित प्रयोग गरिएको आरोप छ।