मस्कको सम्पत्ति ५०० अर्ब डलर, यस्तो उपलब्धि हासिल गर्ने पहिलो व्यक्ति बने

एजेन्सी । अमेरिकाका धनाढ्य व्यापारी इलोन मस्क ५०० अर्ब डलर बराबरको सम्पत्ति हुने पहिलो व्यक्ति बनेका छन् ।

विश्व प्रविधि र व्यापारको क्षेत्रमा मस्कको अप्रतिम प्रभाव यसले उजागर गरेको छ ।

मस्कको विद्युतीय गाडी कम्पनी टेस्लाको भ्यालु बढिरहेकाले मस्कको सम्पत्तिमा वृद्धि भएको हो । टेस्लाको गाडीको राम्रो बिक्री, नवप्रवर्तन र लगानीकर्ताको विश्वासका कारण टेस्लाको सेयरहरू बढिरहेका छन् ।

टेस्लाबाहेक पनि स्पेसएक्समार्फत मस्कले सम्पत्ति बढाइरहेका छन् । स्पेसएक्सले सरकारी ठेक्काहरू पाइरहेको छ र भूउपग्रहका कामहरूलाई विस्तार गरिरहेको छ ।

त्यसैगरी कृत्रिम बुद्धिमत्ताको क्षेत्रमा मस्कको एक्सएआई कम्पनीले नयाँ उपलब्धि हासिल गरिरहेको छ ।

मस्कको विविधतापूर्ण पोर्टफोलियो, भविष्यमुखी नेतृत्व र प्राविधिक प्रगतिमा निरन्तर जोडले नै उनलाई संसारको सबभन्दा धनी व्यक्ति बनाएको हो ।

बुधवार अपराह्न मस्कको कुल सम्पत्ति ५००.१ अर्ब डलर पुगेको फोर्ब्स पत्रिकाले लेखेको थियो । तर, त्यो पछि केही घटेर ४९९ अर्ब डलर पुगेको थियो । तैपनि मस्क आफ्ना प्रतिस्पर्धीहरूभन्दा निकै माथि छन् ।

टेस्लामा मस्कको १२ प्रतिशतभन्दा केही बढी सेयर छ । गत एक वर्षमा टेस्लाको स्टक भ्यालुमा उल्लेख्य वृद्धि भएको छ ।

बुधवारको ट्रेडिङमा टेस्लाको सेयर ३.३ प्रतिशतले बढेको थियो । लगानीकर्ताहरूले मस्कको नेतृत्व र रणनीतिक भिजनमा विश्वास गरेको प्रमाण यसबाट पाइन्छ ।

मस्कका अन्य कम्पनीहरूले फाइदा गरिरहेकाले पनि मस्कको सम्पत्तिमा वृद्धि भएको हो ।

डोनल्ड ट्रम्प अमेरिकाको राष्ट्रपति भएपछि केही समय राजनीतिमा केन्द्रित रहेका मस्कले ट्रम्पसँग झगडा परेपछि फेरि व्यापारमै ध्यान दिन थालेका छन् । यसलाई लगानीकर्ताहरूले सकारात्मक रूपमा लिएका छन् । टेस्लाको स्टक बढ्नु र मस्कको व्यक्ति सम्पत्तिमा बढोत्तरी हुनुका पछाडि पनि यही कारण जिम्मेवार छ ।