२८ दिनको लागि बैंकहरुबाट ५० अर्ब तरलता खिच्दै राष्ट्र बैंक

काठमाडौं । नेपाल राष्ट्र बैंकले नयाँ आर्थिक वर्ष लागेपछि पनि लगातर तरलता प्रशोचन गर्न सुरु गरेको छ । केन्द्रीय बैंकले आइतबार निक्षेप संकलन बोलकबोलमार्फत् २८ दिनको लागि ५० अर्ब रुपैयाँ तरलता प्रशोचन गर्ने भएको हो ।
बैंकिङ प्रणालीमा अधिक तरलता भएपछि पछिल्लो २ आर्थिक वर्षदेखि नै लगातार तरलता प्रशोचन गरीरहेको केन्द्रीय बैंकले चालु आर्थिक वर्षमा पनि सुरुबाटै तरलता प्रशोचन गर्न लागेको हो ।

चालु आर्थिक वर्ष सुरु भएपछि गत साता आइतबार केन्द्रीय बैंकले ५० अर्ब रुपैयाँ र बुधबार ८० अर्ब रुपैयाँको निक्षेप संकलन उपकरण बोलकबोलमा ल्याएको थियो । आइतबार पुनः ५० अर्बको निक्षेप संकलन बोलकबोल गर्ने भएको छ । उक्त बोलकबोलमार्फत् २८ दिनका लागि ५० अर्ब रुपैयाँ तरलता प्रशोचन गर्ने भएको हो ।

निक्षेप संकलन उपकरणको ब्याजदर बोलकबोल मार्फत तय हुनेछ । बैंकहरुमा निक्षेपको तुलनामा कर्जा लगानी न्युन हुँदा अधिक तरलताको चाप बढरिहेको छ ।

लगानी गर्न नसकेपछि साढे ७ खर्ब रुपैयाँ भन्दा धेरै रकम बैंकहरुले स्थायि निक्षेप सुविधा र निक्षेप संकलन बोलकबोलमा लगानी मार्फत राष्ट्र बैंकमा राखेका छन् । ८ साउनको तथ्यांक अनुसार बैंकहरुले लगानी गर्न नसकेर राष्ट्र बैंकमा राखेको रकम ६ खर्ब ७५ अर्ब ३५ करोड छ । आइतबार थप ८० अर्ब तरलता प्रशोचन गर्न केन्द्रिय बैंकले बोलकबोल आह्वान गरेको छ ।