पोखरामा ‘एसजे मोटो हिमालयन जाभा क्याफे’ सञ्चालनमा: बाइक, कफी र संस्कृतिको समिश्रण

पोखरा । मोटरसाइकल, कफी र सांस्कृतिक उत्साहको संगम बनेको ‘एसजे मोटो हिमालयन जाभा क्याफे’ ले पोखराको लेकसाइडमा आफ्नो सेवा सुरु गरेको छ । एसजे मोटोले हिमालयन जाभासँगको सहकार्यमा उक्त क्याफे र ग्यालरी सञ्चालनमा ल्याएको हो ।

चैत्र २३मा आयोजित उद्घाटन समारोहमा दर्जनौं पाहुनाहरूले सहभागिता जनाएका थिए । कार्यक्रममा प्रत्यक्ष मोटरसाइकल प्रदर्शन, अन्तरक्रियात्मक सत्रहरू र उत्कृष्ट हिमालयन जाभा कफीको स्वाद चाख्न पाइएको थियो, जसले उपस्थित सबैलाई अविस्मरणीय अनुभव प्रदान गरेको थियो ।

एसजे मोटोका संस्थापक सौरभ ज्योति भन्छन्, ‘हामीले मोटरसाइकलको रोमाञ्च र कफी संस्कृतिको न्यानोपनलाई एउटै छानामुनि ल्याउन सफल भएका छौं । यात्रु र बाइकरहरूको लागि प्रमुख गन्तव्य बनेको पोखरा, यस्तो नयाँ अनुभव सुरु गर्नका लागि उपयुक्त स्थान हो ।’

क्याफेले प्रिमियम कफीसँगै शीर्ष-स्तरीय बाइक गियर र सामानहरू पनि उपलब्ध गराउनेछ । यसले बाइकप्रेमीहरू, साहसिक यात्रुहरू र कफी पारखीहरूलाई लक्षित गर्दै उनीहरूका लागि भेटघाट, अनुभव साझा गर्ने तथा आरामदायी समय बिताउने नयाँ गन्तव्यका रूपमा आफूलाई प्रस्तुत गरेको छ ।

हिमालयन जाभा र एसजे मोटो दुबै संस्थाले पोखरामा नयाँ शाखा खोल्नु आफ्नो दीर्घकालीन योजनाअन्तर्गत रहेको बताएका छन्, जसले यात्रुहरूलाई मोटरसाइकल र कफीप्रतिको साझा जोश अनुभव गराउनेछ ।