काठमाडौं । हाइड्रो व्यवसायी ज्ञानेन्द्रलाल प्रधान हाउजिङ व्यवसायमा प्रवेश गरेका छन् । प्रधानले काठमाडौंको मनमैजुमा ३५ हाउजिङ र एउटा कमर्सियल बिजनेस कम्प्लेक्स निर्माण गरिरहेका हुन् ।
गृहलक्ष्मी हाउजिङ कम्पनीको नामबाट थालिएको हाउजिङ निर्माण कार्य आधा सकिएको हो । गृहलक्ष्मीमा प्रधानको ४६ प्रतिशत सेयर स्वामित्व छ ।
जलविद्युत व्यवसायमा चिनिएका प्रधानको व्यवसायिक साझेदार डेगेन्द्रकुमार श्रेष्ठ हुन् । उनको रियल स्टेट व्यवसायमा ६ वर्षको अनुभव छ ।
मनमैजुमा १ अर्ब ३० करोड लगानीमा हाउजिङ र ६ तले व्यावसायिक कम्प्लेक्स बन्नेछ । जसमध्ये ७५ करोड रुपैयाँ स्वपुँजी र ४० करोड ऋण रहेको छ । बाँकी १५ करोड रुपैयाँ कम्पनीले घर बेचेर आम्दानी गर्ने योजना बनाएको छ ।
१५ करोड उठाउन गृहलक्ष्मीले सन् २०२५ को अन्त्यदेखि घरहरु बेच्न सुरु गर्ने छ । हालसम्म कम्पनीले हाउजिङ बनाउन ८८ करोड रुपैयाँ खर्च गरिसकेको छ । हालसम्म सिभिलतर्फ सीमा, भुमिगत पानी ट्यांकी, विद्युत र धातुसम्बन्धि काम अघि बढिरहेको छ । गत फेब्रुअरीको अन्त्यसम्म कम्पनीले केही बुकिङ पनि प्राप्त गरिसकेको छ ।
हाउजिङ र व्यावसायिक कम्प्लेक्स मनमैजुको फुटुङमा अवस्थित छ । परियोजना गोंगबु बसपार्कबाट ४.२ किमि दुरीमा अवस्थित छ ।
उत्तर काठमाडौंको मनमैजु आवासिय क्षेत्रका साथै नयाँ व्यवसायिक हब बन्दै गरेको स्थितिमा प्रधानले हात हालेको हाउजिङ परियोजना फलदायी हुने अपेक्षा गरिएको छ ।
१८ रोपनीमा फैलिएको कोलोनीमा आधुनिक बक्स मोडलका ३५ वटा आकर्षक घर निर्माण भइरहेका छन् । जसमध्ये हाल १४ वटा संरचना निर्माण भइसकेका छन् ।
पूर्व र दक्षिण मोहडाका यी घरहरू ४ आना देखि ११ आना जग्गामा निर्माण भएका छन् ।
प्रतिक्रिया