काठमाडौं । राजावादी ‘संयुक्त जनआन्दोलन समिति’ले काठमाडौं महानगरपालिकाका मेयर बालेन्द्र शाह (बालेन) लाई पूर्वराजा ज्ञानेन्द्र शाहमाथि जारी गरिएको जरिवाना पत्र फिर्ता लिन चेतावनी दिएको छ ।
समितिले एक विज्ञप्ति जारी गर्दै यदि उक्त जरिवाना पत्र फिर्ता नलिए कानूनी उपचारको बाटो अपनाइने चेतावनी दिएको छ । संयुक्त जनआन्दोलन समितिका कार्यवाहक संयोजक डा. जगमान गुरुङले विज्ञप्तिमा शुक्रबार आयोजित आन्दोलनको जिम्मेवारी आयोजक संस्थाहरुले नै लिने बताएका छन् ।
शुक्रबार तीनकुनेमा राजावादीले गरेको प्रदर्शनका क्रममा तोडफोड र फोहोर भएको भन्दै काठमाडौं महानगरपालिकाले पूर्वराजा ज्ञानेन्द्र शाहलाई ७ लाख ९३ हजार रुपैयाँ जरिवाना तोकेको थियो ।
जरिबानाको पत्र लिएर महानगरको टोली आइतबार पूर्वराजा ज्ञानेन्द्र शाहको निवास निर्मल निवास पुगेको थियो । तर, पूर्वराजाले शाहको पत्र बुझ्न अस्वीकार गरेका छन् ।
यसैबीच महानगरले तोकेको जरिवाना रकमका लागि विदेशमा रहेकाहरुले रकम संकलन गरेका छन् । उक्त अभियानले ७ लाख ९७ हजार रुपैयाँ उठेको जानकारी दिँदै महानगरले तोकेको रकम पुगेको भन्दै पैसा उठाउन बन्द गरेको जनाएको छ ।
प्रतिक्रिया