नेपालमै लुकेको छु भन्दै प्रसाईंको चुनौती: तिमीहरूको मलामी लिएर आउँदैछु !

काठमाडौं । दुर्गा प्रसाईंले आफू नेपालमै रहेको दाबी गरेका छन् । तीनकुनेमा शुक्रबार भएको राजावादी प्रदर्शन हिंसात्मक भएपछि प्रसाई फरार रहेका छन् ।

शुक्रबारबाटै फरार उनलाई प्रहरी परिचालन भइरहेको गृहमन्त्रालयले जनाए पनि सोमबार रातिसम्म उनी पक्राउ परेका छैनन् । प्रसाईं भारत पुगिसकेको समाचारहरु सार्वजनि भइरहँदा उनले आफ्नो सचिवालयको फेसबुकमार्फत नेपालमै रहेको दाबी गरेका छन् ।

आफूलाई सिंहसँग तुलना गर्दै अहिले भावी रणनीति तयार गर्न जुटेको उनको भनाइ छ । आफूले नेपालमै लुक्ने ठाउँ भेटेको भन्दै उनले नेताहरुले भविष्यमा त्यस्तो ठाउँसमेत भेट्न नसक्ने बताएका छन् ।

‘सिकार गर्नुभन्दा पहिला सिंह पनि एक कदम पछि हट्छ, अनि पुनः आक्रमण गर्छ ! दुर्गा प्रसाई सिंह नै हो ,अब छिट्टै तिमीहरूको मलामी लिएर आउँदैछ, भ्रष्टाचारी हो ! मैले त लुक्ने ठाउँ भेटेको छु, नेपाल मै छु, भावी रणनीति तयार गर्दैछु, तर तिमीहरूले त्यो पनि पाउँदैनौ, बुझिराख !’ उनले चुनौती दिँदै भनेका छन् ।