काठमाडौं । काठमाडौं महानगरपालिकाका मेयर बालेन शाहले प्रधानमन्त्री केपी शर्मा ओलीलाई सम्बोधन गर्दै नेपाली नागरिकका लागि जीवनयापनको आधार सुनिश्चित गर्न आग्रह गरेका छन् ।
शुक्रबार बिहान सामाजिक सञ्जालमार्फत मेयर शाहले नेपाली भएर सम्मानजनक जीवन जिउने व्यवस्था गर्नुपर्ने विषय उठाएका हुन्।
प्रधानमन्त्रीलाई ‘प्यारो प्रधानमन्त्री ज्यू’ भनेर सम्बोधन गर्दै शाहले कवितात्मक शैलीमा भनेका छन्, ‘मलाई मेयर हो भनेर बिर्सिनुस्, नेपाली भएर बाँच्ने आधार त दिनुस्।’
यस्तो छ बालेनको स्टेटस
प्यारो प्रधानमन्त्री ज्यु ,
अमेरिकाले करप्ट भनिसक्यो ,
इन्डियाले भिकारी भनिसक्यो ,
चीनले मान्छे गन्दैन ,
मलाई मेयर हो भनेर बिर्सिनुस ,
नेपाली भएर बाच्ने आधार त दिनुस् ।
यसअघि शाहले अमेरिकाकी राष्ट्रपति डोनाल्ड ट्रम्पलाई सम्बोधन गर्दै टिप्पणी गरेका थिए । ट्रम्पलाई शाहले आफ्नो देशलाई विश्वबाट अलग गर्ने र विश्वलाई अगाडि बढ्न दिने सल्लाह समेत दिएका छन् । शाहले डीभी कार्यक्रम बन्द गर्न समेत आग्रह गरेका छन् ।
शाहले ट्रम्पलाई धन्यवाद दिँदै भनेका छन्, ‘तपाईंले हामीलाई हाम्रो देश तपाईंको देशभन्दा राम्रो छ भन्ने महसुस गराइदिनुभयो।’
नेपाल मात्र नभइ अमेरिका पनि गरिब रहेको बालेनको टिप्पणी छ । ‘हामी गरिब छौं किनभने हाम्रा जनता हाम्रो देश छोडिरहेका छन्,’ शाहले भनेका छन्, ‘तपाईं गरिब हुनुहुन्छ किनभने तपाईंका जनता तपाईंको देश बनाउन सक्दैनन् । तपाईंहरू अल्छी मानिसहरूलाई यसको लागि बाँकी विश्व चाहिन्छ।’
अमेरिकाले नेपाललाई दिएको सहयोग बन्द गरेको र उक्त सहयोग ठगी भएको ट्रम्पको भनाइ सार्वजनिक भएपछि मेयर शाहले यस्तो टिप्पणी गरेका हुन् ।
प्रतिक्रिया