ओलीको नजरमा प्रचण्ड: उपयोग गर्ने र फ्याँक्ने चरित्र
काठमाडौं । सत्ताको नेतृत्व गरिरहेको दल नेकपा एमालेको केन्द्रीय कमिटी बैठकमा अध्यक्ष केपी शर्मा ओलीले पेस गरेको राजनीतिक प्रतिवेदनमाथि छलफल सुरु भएको छ ।
पार्टी केन्द्रीय कार्यालयमा जारी बैठकमा अध्यक्ष ओलीले ४३ पेज लामो राजनीतिक प्रतिवेदन पेस गरेका छन् ।
प्रतिवेदनमा पछिल्लो समसामयिक राजनीति, सरकार गठन भएपछिको ६ महिने समीक्षा, सरकार सञ्चालन, अर्थतन्त्र लगायतका विषयमा उल्लेख गरिएको छ ।
माओवादी केन्द्र र प्रचण्डबारे ओलीले प्रतिवेदनमा गम्भीर आलोचना गरेका छन्। प्रचण्डले सहकार्यका लागि दिएको प्रतिबद्धता पूरा नगरेको र बारम्बार अवसरवादी नीति अवलम्बन गरेको भनिएको छ । यसले मुलुकमा राजनीतिक स्थिरता र सुशासनका लागि चुनौती थपेको बताइएको छ।
प्रचण्डमाथि व्यक्तिगत स्वार्थ, पदलिप्सा, र अनियमित गतिविधिमा संलग्न रहेको आरोप लगाउँदै उनी नेतृत्वमा रहेको माओवादी केन्द्रले जनतामा विश्वास घटाएको उल्लेख छ।
एमाले र माओवादी केन्द्रबीच विगतमा भएका सहकार्य प्रयासहरूलाई असफल बनाउन प्रचण्डको भूमिकालाई दोषारोपण गरिएको छ। प्रतिवेदनमा माओवादी केन्द्रले अलोकतान्त्रिक अभ्यास र विश्वासघात गरेको दाबी गरिएको छ।
प्रचण्ड नेतृत्वको पछिल्लो सरकार भ्रष्टाचार र अराजकताको संरक्षक भएको आरोप प्रतिवेदनमा छ। विशेषगरी सुन तस्करी प्रकरण र ठूला भ्रष्टाचार काण्डहरूमा सरकारको संलग्नता र संरक्षणप्रति तीव्र आलोचना गरिएको छ।
प्रतिवेदनमा माओवादी केन्द्रसँगको सहकार्य अब सम्भव नभएको र आगामी दिनमा नेपाली कांग्रेससँग सहकार्यलाई प्राथमिकता दिने भनिएको छ।
प्रतिवेदनले प्रचण्डलाई ‘आफ्नै स्वार्थका लागि सहकार्यलाई तोड्ने’ र ‘राजनीतिक स्थायित्वलाई कमजोर बनाउने’ मुख्य पात्रका रूपमा चित्रित गरेको छ । प्रतिवेदनमा भनिएको छ, ‘माओवादी केन्द्रका अध्यक्ष पुष्पकमल दाहाल ‘प्रचण्ड’ले विगतका सहकार्यहरूलाई विश्वासघात गरेर पदलिप्साको राजनीति गरेका छन् । यो प्रवृत्तिले सुशासन र स्थायित्वका प्रयासहरूलाई असफल बनाएको छ।’
प्रचण्ड नेतृत्वको सरकारमाथि ठूला भ्रष्टाचार काण्डहरूको संरक्षण गरेको आरोप ओलीले लगाएका छन् । प्रतिवेदनमा भनिएको छ:’सुन तस्करी, ललिता निवास प्रकरण र ठूला भ्रष्टाचारका काण्डहरूमा सरकारको प्रत्यक्ष संलग्नता र संरक्षण देखियो। यसले सुशासनप्रतिको जनअपेक्षालाई ध्वस्त पारेको छ ।’
प्रतिवेदनले प्रचण्डमाथि लोकतान्त्रिक प्रणालीलाई कमजोर बनाउन षड्यन्त्र गरेको आरोप लगाएको छ । ‘उनको आचरणले विधिको शासनलाई कमजोर बनाउन मात्र होइन, आम जनताको आशा-अपेक्षामाथि प्रहार गरेको छ।’
प्रतिवेदनमा ओलीले प्रचण्डको व्यवहारलाई ‘अस्थिरता र स्वार्थका लागि सम्झौता गर्ने चरित्र’ भनेर व्याख्या गरेका छन् ।
‘उनले पदका लागि दलहरूको सहकार्यलाई बारम्बार भंग गरेका छन्। यसले विश्वासयोग्य राजनीतिमा ठूलो क्षति पुर्याएको छ।’
प्रतिवेदनले प्रचण्ड नेतृत्वलाई ‘सत्ता टिकाउन सैद्धान्तिक मूल्यहरूलाई बेवास्ता गर्ने’ भनी चित्रण गरेको छ।
प्रतिवेदनमा प्रचण्डको नेतृत्वलाई जनताको विश्वास गुमाउने प्रमुख कारणका रूपमा चित्रण गरिएको छ । ‘उनको नेतृत्वको सरकारले जनताको आशा-अपेक्षा तोडेर अराजकता निम्त्याएको छ।’
क्लिकमान्डु
