सहकारी ठगीः रवि लामिछानेले ७५ लाख विदेशमा पठाएको भेटियो, कसलाई पठाए ?

काठमाडौं । सहकारी ठगी प्रकरणमा पक्राउ गरेर अनुसन्धान जारी रहेका राष्ट्रिय स्वतन्त्र पार्टी (रास्वपा)का सभापति रवि लामिछानेले ७५ लाख १० हजार २ रुपैयाँ ६ पैसा रेमिट्यान्समार्फत विदेशमा भुक्तानी गरेका छन् ।

पूर्वउपप्रधान तथा गृहमन्त्री समेत रहेका लामिछानेले विभिन्न १० पटकमा उक्त रकम विदेशमा पठाएको पाइएको हो ।

स्वर्णलक्ष्मी सहकारी ठगी प्रकरणमा प्रहरीले गरेको अनुसन्धानबाट यस्तो खुल्न आएको हो । उनले नौ महिनाको अवधिमा ७५ लाख १० हजार २ रुपैयाँ ६ पैसा विदेशमा पठाएको उल्लेख छ । लामिछानेले उक्त रकम चार पटकको अवधिमा पठाएको काठमाडौं जिल्ला अदालतमा आइतबार दायर भएको आरोपपत्रमा उल्लेख छ ।

आरोपपत्रमा उनले सन् २०२१ नोभेम्बर ९ मा १७ लाख ८६ हजार ५६४ रुपैयाँ, सन् २०२२ मार्च १३ मा २२ लाख १६ हजार ७२२ रुपैयाँ पठाएको पाइएको छ । सन् २०२२ मार्च २७ मा २१ लाख ९५ हजार १०० रुपैयाँ, सन् २०२२ सेप्टेम्बरमा १३ लाख ११ हजार ६१६ रुपैयाँ पठाएका छन् ।

लामिछानेले बयानका क्रममा उक्त रकम गोर्खा मिडिया नेटवर्कले अन्तराष्ट्रिय समाचार एजेन्सीहरु, स्याटलाईट कम्पनी लगायतसँग सम्झौता गरेको बताएका छन् । लाओएशिया प्यासिफिक स्याटलाइट कम्पनीसँग सम्झौता गरेको र उक्त रकम त्यही कम्पनीलाई पठाएको हुनसक्ने उनले बयानमा उल्लेख गरेका छन् ।

लामिछानेविरूद्ध काठमाडौं जिल्ला अदालतमा आइतबार मुद्दा दर्ता भएको छ । स्वर्णलक्ष्मी सहकारीको बचत अपचलन प्रकरणमा रविसहित ३९ जना विरुद्ध मुद्दा दायर भएको हो ।

उनीहरूसँग कुल २ अर्ब ४१ करोड ३४ लाख रुपैयाँभन्दा बढी बिगो मागदाबी गरिएको छ । रवि लामिछाने र गोरखा मिडियाका सञ्चालक जीबी राईविरुद्ध ५ करोड ८ लाख रुपैयाँभन्दा बढी बिगो मागदाबी गरिएको छ ।

राजधानीको कालिमाटीस्थित स्वर्णलक्ष्मी बहुउद्देश्यीय सहकारी संस्थाको रकम अपचलनबारे प्रहरीले १० महिनाको लामो अनुसन्धान गरेको थियो । प्रहरीले ४४ जनालाई प्रतिवादी बनाउने गरी प्रतिवेदन तयार पारेको थियो तर सरकारी वकिल कार्यालयले ३९ जनालाई मात्र प्रतिवेदन बनाएको हो ।

सहकारीमा नक्कली ऋण बनाउने, ठगी गर्ने र संगठित अपराधमा अनुसन्धान गरेको थियो ।

अनुसन्धानका क्रममा गीतेन्द्रबाबु (जीबी) राईको हर्बो इन्टरनेसनल प्रालि मा १० करोड २७ लाख ९४ हजार ५२२ रुपैयाँ अपचलन भएको छ । त्यस्तै, जीबी ग्रुप अफ कम्पनी प्रालि, कुमकुम हर्बल इन्डस्ट्रिज र देवदीप एग्रिकल्चर एन्ड एनिमल हस्बेन्डरी फार्म जस्ता कम्पनीहरूमार्फत ठूलो मात्रामा रकम हिनामिना भएको बताइएको छ ।

अनुसन्धानका क्रममा कार्तिक महिनामा लेखा समिति सदस्य सुनिता नेवा र ऋण उप-समिति सदस्य कमल लामासहित पाँच जनालाई पक्राउ गरिएको थियो । रवि लामिछाने र पूर्व डीआईजी जोशी हाल हिरासतमा छन् भने कोषाध्यक्ष कुमार रम्तेल कारागारमा छन् । अन्य प्रतिवादीहरूलाई फरार सूचीमा राखी अनुसन्धान अगाडि बढाइएको छ।

प्रहरीले रकम अपचलनसँग सम्बन्धित कागजात, सञ्चालकहरूको विवरण, अडिट रिपोर्ट, र साधारणसभाको निर्णयको अध्ययन गरेको थियो ।