बीबीसीको १ सय प्रभावशाली महिलाहरुमा नेपालकी आचार्य

काठमाडौं । बीबीसीले सार्वजनिक गरेको विश्वभरका १०० जना प्रेरणादायी र प्रभावशाली महिलाहरुको सूचीमा नेपाली युवती शिलशिला आचार्य पनि परेकी छन् ।

लामो समयदेखि पर्यावरणको संरक्षणमा अभियान चलाइरहेकी शिलशिला बीबीसीको २०२४ को उत्कृष्ट सूचीमा नेपालबाट छनोट भएको एक्लो महिला हुन् ।

बीबीसीले हरेक वर्ष विभिन्न क्षेत्रमा योगदान पुर्‍याएका १ सय महिलाहरुको सूची सार्वजनिक गर्दैआएको छ । यसपटक शिलशिला आचार्य सयको सूचीमा परेकी हुन् । आचार्यले पसलहरुमा प्लास्टिकको झोला इन्कार गर्दै जलवायु परिवर्तन विरुद्ध अभियान चलाउँदै आएकी छन् ।

२०१४ देखि उनले ‘धन्यवाद म आफैं झोला बोक्छु’ अभियान सञ्चालन गर्दैआएकी छन् । अर्थात् यस अभियानले पसलमा दिइने प्लास्टिकका झोला नबोकेर ग्राहकलाई आफैं कपडाका झोला प्रयोग गर्न प्रोत्साहन गर्छ । फलस्वरुप हाल भाटभटेनी लगायत काठमाडौंका ठूला सुपरमार्केटमा प्लास्टिकको सट्टा कपडाका झोला प्रयोग हुँदैआएको छ ।

बीबीसीले यस वर्ष नोबेल पुरस्कार विजेता नादिया मुरादसहित १०० जना महिलाको सूची सार्वजनिक गरेको हो । जहाँ पर्यावरण, कृषि, स्वास्थ्य, राजनीतिक अभियान लगायत क्षेत्रमा सक्रिय र प्रभावशाली महिलाहरुको नामछ ।

नेपालकी शिलशिला आचार्यले भने फोहोर व्यवस्थापनको क्रममा अभनी भेन्चर्स नामक संस्था चलाउँछिन् । जहाँ उनको संस्थाले फालिएका प्लास्टिक संकलन गरेर विभिन्न सजावटका समग्री बनाएर पुनप्रयोगमा ल्याउने गरेको छ ।

साथै सीमान्तकृत समुदायका ३ सय भन्दा धेरैलाई रोजगारी पनि दिएको छ । आचर्यले यस संस्थामार्फत हिमालमा फालिएका प्लास्टिकको व्यवस्थापनमा पनि काम गरेकी थिइन् ।

गुल्मीमा जन्मिएकी शिलशिला आचार्य चिकित्सा अध्ययनका लागि पूर्ण छात्रवृत्ति पाए पनि छाडेर वातावरण अध्ययन गर्दै जलवायु तथा पर्यावरणको क्षेत्रमा अभियन्ता बनेर लागेकी थिइन् ।