निजी क्षेत्रसँग मिलेर आर्थिक विकास गर्ने गरी बजेट ल्याएको छु: अर्थमन्त्री

काठमाडौं । नयाँ चरणको आर्थिक सुधार गर्ने गरी बजेट ल्याइएको अर्थमन्त्री वर्षामान पुनले बताएका छन् ।

मंगलबार १८ खर्ब ६० अर्ब ३० करोड रुपैयाँको बजेट संघीय संसदमा पेस गरेका अर्थमन्त्री पुनले बुधबार अर्थ मन्त्रालयमा पत्रकार सम्मेलन गर्दै आर्थिक सुधार आयोग गठनले सकारात्मक सन्देश दिने बताए । आगामी आर्थिक वर्ष २०८१/८२ को बजेटमा आर्थिक क्षेत्रको सुधार गर्न आयोग गठन गर्ने घोषणा गरेका थिए ।

सरकारेले निजी क्षेत्रलाई साथमा लिएर मात्रै अबको आर्थिक विकासमा अगाडि बढ्ने पुनले बताए । सडक, पूर्वाधार, पुलसहितको पूर्वाधार विकासमा राज्य एक्लैले खर्च गर्न नसक्ने भएकाले‍ अर्थतन्त्रमा ७५ प्रतिशतभन्दा बढी योगादन दिने निजी क्षेत्रसँग सहकार्य गरेर जान खोजिएको पुनले बताए ।