डिजिटल लिटरेसीका लागि एभरेष्ट बैंकले बनायो ५ भिडियो

काठमाडौं । एभरेष्ट बैंकले डिजिटल लिटरेसीका लागि वित्तीय चेतनामूलक पाँचवटा भिडियो निर्माण गरेको छ । जनतालाई डिजिटल बैंकिङप्रति जागरुक र सजग बनाउने उद्देश्यले भिडियो निर्माण गरेको बैंकले जनाएको छ ।

निर्माण भएका भिडियोहरु शृंखलाबद्ध रुपमा सार्वजनिक गरिने बैंकका बजार तथा संस्थागत निक्षेप विभाग प्रमुख पुष्पराज उप्रेतीले जानकारी दिए ।

भिडियोमा मोबाइल बैंकिङको प्रयोग, धारा-बत्ती तथा स्कुलको बिल भुक्तानी तरिका, डिजिटल ठगीबाट बच्ने उपाय, सरकारी राजस्व भुक्तानी तरिका र क्यूआर कोडको प्रयोगसम्बन्धी विधिबारे उल्लेख छ ।

भिडियोबाट सम्पूर्ण ग्राहक तथा सरोकारवालामा वित्तीय चेतना अभिवृद्धि हुने विश्वास बैंकले लिएको छ ।

बैंकले नेसनल बैंकिङ इन्स्टिच्युटसँगको सहकार्यमा सातै प्रदेशमा वित्तीय साक्षरता कार्यक्रमको सुरुवात भएको जानकारीसमेत गराएको छ ।