एक्समा थपियो अडियो र भिडियो कलिङ फिचर

एजेन्सी । एक्स (ट्विटर)मा अडियो र भिडियो कलिङ फिचर सुरु भएको छ । तत्कालका लागि एप्पलका आईओएस डिभाइसमा यो फिचरलाई कम्पनीले सुरु गरेको हो ।

छिट्टै नै एन्ड्रोइड डिभाइसमा पनि यो फिचर सुरु गरिने कम्पनीले जनाएको छ । एक्सका अनुसार प्रिमियम सब्सक्राइभर्स (सदस्यता लिएका प्रयोगकर्ता)हरुले यो फिचरको प्रयोग गर्न पाउनेछन् ।

सदस्यता नलिएकाहरुले भने फोन आएको खण्डमा उठाउन पाउनेछन् । तर, आफैंले कल गर्न भने पाउने छैनन् । एक्सका मालिक एलन मस्कका अनुसार यो अडियो र भिडियो कलिङमा सुरुवाती भर्जनमात्रै भएकाले यसलाई थप परिष्कृत बनाउँदै लगिनेछ ।

एक्समा यो फिचरको प्रयोग गर्न प्रयोगकर्ताले सेटिङमा रहेको प्राइभेसी एन्ड सेफ्टी फिचरमा क्लिक गर्नुपर्छ । त्यहाँ रहेको डाइरेक्ट म्यासेज अप्सनमा गई अडियो र भिडियो कलिङ अन गरेपछि यो फिचर प्रयोग गर्न सकिने कम्पनीले जनाएको छ ।