शोधनान्तर स्थिति ५३ अर्ब ६१ करोड रुपैयाँले बचत

काठमाडौं । चालू आर्थिक वर्षको पहिलो दुई महिना (साउन र भदौ)मा शोधनान्तर स्थिति ५३ अर्ब ६१ करोडले बचतमा रहेको छ । नेपाल राष्ट्र बैंकले मंगलबार सार्वजनिक गरेको देशको वित्तीय स्थितिअनुसार अघिल्लो वर्षको सोही अवधिमा २० अर्ब ८० करोडले घाटामा थियो ।

त्यस्तै चालु खाता भदौमा २३ अर्ब ५० करोड रुपैयाँले बचतमा गएको छ । साउनमा चालु खाता १२ अर्ब ९९ करोड रुपैयाँले बचतमा थियो ।

अमेरिकी डलरमा अघिल्लो वर्षको सोही अवधिमा २८ करोड ९० लाखले घाटामा रहेको चालु खाता समीक्षा अवधिमा १७ करोड ७७ लाखले बचतमा रहेको छ ।

समीक्षा अवधिमा पुँजीगत ट्रान्सफर ४१.७ प्रतिशतले कमी आई ८५ करोड ८ लाख कायम भएको छ भने खुद प्रत्यक्ष वैदेशिक लगानी ३ अर्बले धनात्मक छ ।

अघिल्लो वर्षको सोही अवधिमा पुँजीगत ट्रान्सफर १ अर्ब ४६ करोड कायम भएको थियो भने खुद प्रत्यक्ष वैदेशिक लगानी ८० करोड ९७ लाखले रुपैयाँले ऋणात्मक थियो । समीक्षा अवधिमा शोधनान्तर स्थिति ५३ अर्ब ६१ करोड रुपैयाँले बचतमा छ ।

अघिल्लो वर्षको सोही अवधिमा शोधनान्तर स्थिति २० अर्ब ८१ करोड रुपैयाँले घाटामा रहेको थियो । अमेरिकी डलरमा अघिल्लो वर्षको सोही अवधिमा १६ करोड ३४ लाखले घाटामा रहेको शोधनान्तर स्थिति समीक्षा अवधिमा ४० करोड ५६ लाखले बचतमा छ ।