श्री एयरलाइन्समा समस्या देखिएपछि विमान ट्याक्सी वेबाट पार्किङमा फिर्ता

काठमाडौं । श्री एयरलाइन्सको विमानमा प्राविधिक समस्या देखिएको छ । उडान नम्बर श्री ८२५ बाट आज दिउँसो साढे २ बजे काठमाडौंबाट भैरहवा उड्न लागेको विमानमा प्राविधिक समस्या देखिएको हो । 

त्रिभुवन अन्तर्राष्ट्रिय विमानस्थलबाट भैरहवातर्फ उडान गर्न लागेको विमानमा प्राविधिक समस्या भएको इन्डिकेटरले जानकारी दिएपछि ट्याक्सी वेबाट विमान फर्काउँदै पार्किङ (एप्रोन) मा ल्याइएको हो ।

इडिकेसनले समस्या हुन सक्ने जानकारी दिएपछि प्राविधिक चेकजाँच गर्न विमानलाई एप्रोनमा फिर्ता गरिएको श्री एयरलाइन्सका प्रवक्ता अनिल मानन्धरले जानकारी दिए ।

‘इन्डिकेटरले समस्या हुन सक्ने जानकारी दिएपछि प्रोटोकलअनुसार विमानलाई उडान नगरी एप्रोनमा जाँच गर्न फिर्ता गरिएको हो,’ उनले भने,‘ प्राविधिकले विमान जाँच गर्दा कुनै समस्या नभएको रिपोर्ट दिएका छन् । कहिलेकाहिँ प्राविधिक त्रुटीले पनि इन्डिकेटर बल्न सक्छ ।’

टेक्निसियन प्राविधिक समस्या नभएको रिपोर्ट दिएकाले १०-१५ मिनेटमा फेरी विमान भैरहवामा उड्ने मानन्धरले बताए ।