राजस्व परामर्श समितिले पुसभित्रै सुझाव बुझाउने

काठमाडौं । नेपाल राजश्व परामर्श समितिका अध्यक्ष महेशप्रसाद दाहालले समितिले आगामी आर्थिक वर्षमा सरकारले बजेटमा व्यवस्था गर्नुपर्ने नीतिको विषयमा पुस महिनाभित्र नै सुझाव पेस गर्ने बताएका छन् ।

मंगलबार समितिको कार्यालयमा भएको वैदेशिक व्यापारसम्बन्धी अन्तरक्रिया कार्यक्रमा बोल्दै समितिले व्यवसायिक संस्था तथा निजी क्षेत्रको सुझाव सहितको प्रतिवेदन पुस महिनाभित्र बुझाउने बताए । उनले सरकारले आगामी आर्थिक वर्षको बजेटमामा समावेस गर्नुपर्ने विषयमा प्रदिवेदन बनाउनको लागि पाँच वटा समिति बनाएर काम गरिरहेको बताए ।

अध्यक्ष दाहालले समितिले प्रदेश स्तरको राजधानीहरुमा गएर त्यहाँका व्यवसायी र सरकारी निकायहरुको सुझावसमेत लिने तयारी भएको बताए । उनले पछिल्लो समय आर्थिक क्षेत्रमा देखिएका समस्या र सम्भावित राजश्व बिस्तारको क्षेत्रका विषयमा पनि ८ वटा अध्ययन शुरु गरिएको बताए ।

उनले चोभार सुख्खा बन्दरगाहलाई निर्यात बन्दरगाहको रुपमा लैजान सरकारलाई सुझाव दिएको बताए । उनले सरकारले निर्यात बन्दरगाह बनाए निर्यातको लागि उद्योगी,व्यवसायीहरु काठमाडौं बाहिर जान नपर्ने बताए ।

समिति सदस्य लेखनाथ शर्मा पंगेनीले पछिल्लो समय वैदेशिक व्यापारमा सीमा नाकाबाट चोरी पैठारी भएको विषयमा सरकारका सम्बन्धी निकायले अनुगमन गर्न सुझाव दिएको बताए । उनले पछिल्लो समय सीमाभन्दा बढी सामान ल्याउने र नाकामा डम्पिङ गरी विचौलीयाको संयन्त्र बनाएर बजारमा चोरी पैठारीका सामान आउने गरेको बताए ।

उनले सरकारलाई भन्सार विभाग,राजश्व विभाग र व्यवसायीहरुलाई समेत राखेर अन्तक्रिया गरी अवैध व्यापार नियन्त्रण गर्न सुझाव दिएको बताए । सदस्य पंगेनीले सरकारलाई सहजरुपमा राजश्व आउने र व्यापार व्यवसाय पनि पारदर्शीरुपमा बनाउन सरकारलाई सुझाव दिएको बताए ।