हस्तकला निर्यातका लागि चेम्बर र हस्तकला महासंघबीच सहकार्य हुने

काठमाडौं । हस्तकलाका वस्तुहरुको निर्यात प्रवर्द्धनका लागि नेपाल चेम्बर अफ कमर्स र नेपाल हस्तकला महासंघबीच सहकार्य हुने भएको छ ।

व्यापारघाटा न्यूनीकरण र अन्तर्राष्ट्रिय पहिचानका लागि हस्तकलाका सामग्रीले महत्वपुर्ण भूमिका निर्वाह गरेको भन्दै चेम्बर र महासंघले निर्यात प्रवर्द्धनमा सहकार्य गर्न लागेका हुन् ।

चेम्बर अध्यक्ष राजेन्द्र मल्लले हस्तकलाको निर्यात सहजिकरण, कच्चा पदार्थमा सहकार्य, भन्सारमा देखिएका जटिलता हटाउन महासंघसंग हातेमालो गरेर अघि बढ्ने बताए ।

महासंघका नवनिर्वाचित कार्यसमितिका पदाधिकारीलाई जमलस्थित चम्बर भवनमा सोमबार स्वागत गर्दै अध्यक्ष मल्लले नेपालका हस्तकलाका वस्तुहरुको अन्तर्राष्ट्रिय प्रर्दशनी एवं मेलामा सहभागिताका लागि आफूले सक्दो पहल गर्ने बताए ।

‘चरम व्यापारघाटा न्यूनीकरणका लागि वर्तमानको एउटै विकल्प भनेको हस्तकलाका सामानहरुको अन्तर्राष्ट्रियकरण गरेर निर्यात प्रवर्द्धन गर्नु नै हो,’ उनले भने ।

मल्लले हस्तकलाका उद्योगले व्यापक मात्रामा रोजगारी सिर्जना गुर्नुका साथै सीप, कला कैशलका माध्यमबाट संस्कृतिको संरक्षण र सम्वर्द्धनमा ठूलो सहयोग गर्दै आएको बताए ।

अमेरिका, अधिकांश युरोपेली मुलुक, जापान, चीन, भारत, कोरियालगायत एशियाली मुलुकमा समेत नेपाली हस्तकलाका सामानहरु निर्यात भइरहेको भन्दै अध्यक्ष मल्लले राज्यबाट सहुलियत प्राप्त हुने हो भने आर्थिक रुपमा धेरै लाभ लिन सकिने बताए ।

हस्तकलाका सामान निर्यातका क्रममा भन्सार सहजीकरण, व्यवसायीलाई राहत उपलब्ध गराउन तथा अन्य नीतिगत सुधारका लागि आफूले पहल गर्ने अध्यक्ष मल्लको भनाइ छ ।

महासंघका अध्यक्ष प्रचण्ड शाक्यले आफूहरुले उत्पादन गरेका हस्तकलाका वस्तुहरुको निर्यातका लागि भन्सार लगायतका ठाउँमा विभिन्न नीतिगत समस्या रहेको सुनाए ।

निर्यात गर्ने व्यवसायीलाई सरकारले राहतको व्यवस्था गरेपनि वास्तविक व्यवसायीले पाउन नसकेको शाक्यले गुनासो गरे । निर्यात सहजीकरण गरिदिन शाक्यले नेपाल चेम्बर अफ कमर्ससंग आग्रह गरे । जवाफमा अध्यक्ष राजेन्द्र मल्लले हस्तकलाका वस्तुहरुको निर्यात प्रवर्द्धनका लागि आफूले सक्दो पहल गर्ने बताए ।