पुसको तुलनामा माघमा बीमा कम्पनीको व्यवसाय २०% ले घट्यो
काठमाडौं । पुसको तुलनामा माघ महिनामा बीमा कम्पनीहरुको व्यवसाय घटेको छ ।
पुसको तुलनामा माघ महिनामा बीमा कम्पनीहरुको व्यवसाय २०.३० प्रतिशतले घटेको हो ।
बीमा समितिको तथ्यांकअनुसार चालु आवको माघ महिनामा बीमा कम्पनीहरुले १३ अर्ब ११ करोड ५१ लाख रुपैयाँ बीमाशुल्क संकलन गरेका छन् ।
चालुु आवको पुस महिनामा कम्पनीहरुले १६ अर्ब ४५ करोड ५८ लाख रुपैयाँ कुल बीमाशुल्क संकलन गरेका थिए ।
चालु आवको माघ महिनामा संचालनमा रहेका जीवन बीमा कम्पनीले १० अर्ब ३८ करोड ८४ लाख रुपैयाँ कुल बीमाशुल्क संकलन गरेका छन् ।
जुन पुस महिनाको तुलनामा जीवन बीमा कम्पनीहरुको व्यवसाय १८.७४ प्रतिशतले घटेको हो ।
पुस महिनामा जीवन बीमा कम्पनीहरुले १२ अर्ब ७८ करोड ४५ लाख रुपैयाँ कुल बीमाशुल्क संकलन गरेका थिए ।
यस्तै, पुस महिनाको तुलनामा निर्जीवन बीमा कम्पनीको व्यवसाय २५.७३ प्रतिशतले खुम्चिएको समितिको तथ्यांक छ ।
माघ महिनामा निर्जीवन बीमा कम्पनीहरुले दुई अर्ब ७२ करोड ६६ लाख ८२ हजार रुपैयाँ कुल बीमाशुल्क संकलन गरेका छन् ।
पुस महिनामा निर्जीवन बीमा कम्पनीहरुले तीन अर्ब ६७ करोड १२ लाख ९७ हजार रुपैयाँको व्यवसाय गरेका थिए ।
इन्जिनियरिङ बीमा ८७ प्रतिशतले घट्यो
निर्जीवन बीमा व्यवसायतर्फ सबैभन्दा धेरै इन्जिनियरिङ बीमाको व्यवसाय घटेको छ । इन्जिनियरिङ बीमाको व्यवसाय ८७.२२ प्रतिशतले घटेर ८ करोड ३७ लाख रुपैयाँमा खुम्चिएको छ ।
पुस महिनामा इन्जिनियरिङ बीमाबाट कम्पनीहरुले ६५ करोड ५३ लाख रुपैयाँ बीमाशुल्क संकलन गरेका थिए ।
हवाई बीमा ५० प्रतिशतले घटेर ६ करोड ८९ लाख रुपैयाँमा सीमित भएको छ ।
पुस महिनामा हवाई बीमाबाट कम्पनीहरुले १३ करोड ८४ लाख रुपैयाँ बीमाशुल्क संकलन गरेका थिए ।
यस्तै, निर्जीवन बीमा कम्पनीहरुमा सबैभन्दा भन्दा धेरै बीमाशुल्क संकलन हुने मोटर बीमाको व्यवसाय पनि घटेको छ । यस अवधिमा मोटर बीमाको व्यवसाय २६.२७ प्रतिशतले घटेको छ ।
माघ महिनामा कम्पनीहरुले मोटर बीमाबाट एक अर्ब ७ करोड तीन लाख रुपैयाँ बीमाशुल्क संकलन गरेका छन् । पुस महिनामा एक अर्ब ४५ करोड १६ लाख २० हजार रुपैयाँ बीमाशुल्क संकलन गरेका थिए ।
यस्तै, पुसको तुलनामा माघ महिनामा निर्जीवन बीमा कम्पनीको विविध बीमा र कृषि तथा बाली बीमामा समेत गिरावट आएको समितिको तथ्यांक छ ।
पुसको तुलनमा विविध बीमा २६ प्रतिशत र कृषि तथा बाली बीमा १७.५६ प्रतिशतले घटेको हो ।
माघ महिनामा निर्जीवन बीमा कम्पनीहरुले विविध बीमाबाट २७ करोड ६५ लाख रुपैयाँ र कृषि तथा बाली बीमाबाट १७ करोड ३८ लाख रुपैयाँ बीमाशुल्क संकलन गरेका छन् ।
तथ्यांकअनुसार पुसको तुलनामा माघमा लघु बीमा, सम्पत्ति बीमा र सामुन्द्रिक बीमाको व्यवसाय बढेको छ ।
सम्पत्ति बीमाको व्यवसाय ३०.७८ प्रतिशत, सामुन्द्रिक बीमाको व्यवसाय ४ प्रतिशत र लघु बीमाको व्यवसाय ३.१४ प्रतिशतले बढेको हो ।
क्लिकमान्डु
