लुम्बिनीमा सीई कन्स्ट्रक्सनको माया कम्प्लेक्स, यस्ता छन् विशेषता

काठमाडौं । सीई कन्स्ट्रक्सन प्रालिले लुम्बिनीमा माया कम्प्लेक्सको शुभारम्भ गरेको छ । माया डेभलपर्सले रुपन्देहीको तिलोत्तमामा माया कम्प्लेक्सको नयाँ प्रोजेक्ट सुरु गरेको हो । आयोजनाको निर्माण र व्यवस्थापन सीई कन्स्ट्रक्सनले गरेको हो ।

सीईले त्यहाँं आवास, अपार्टमेन्ट र व्यावसायिक कम्प्लेक्स समावेश गर्ने परियोजना प्रस्तुत गरेको हो । पहिलो चरणमा माया डेभलपर्सले माया रेसिडेन्सी ल्याएको छ । त्यसमा ४० रोपनी जग्गामा फैलिएको ४८ इकाई स्वतन्त्र आवास हुने छन् । आयोजना बुद्धचोक, भैरहवाबाट ६ किलोमिटर र राजमार्गबाट १.१ किलोमिटरको दुरीमा अवस्थित छ ।

‘ओन योर ओन होम’ नामक ट्यागलाइनको साथमा यो परियोजना ल्याइएको हो । सबै सुविधाहरूको साथमा बस्ने समुदायमा घर बनाउने सपना देख्नेहरूका लागि यो परियोजना लक्षित छ । माया रेसिडेन्सीमा बालबालिकाको खेल्ने क्षेत्र, हेल्थ क्लब, स्विमिङ पुल, मन्दिर र त्यहाँका बासिन्दाहरूको जीवनस्तर उकास्ने अन्य सुविधाहरू हुने छन् ।

२ हजार ६० वर्ग फुटदेखि २ हजार २ सय वर्ग फुटसम्मको निर्माण क्षेत्र रहेको आधुनिक र परम्परागत लुकको संयोजनमा साढे २ तले भवनको डिजाइन गरिएको छ । विकासकर्ताहरूले घर खरिदकर्ताहरूलाई छनोट गर्नका लागि ३ प्रकारका डिजाइनहरू प्रस्ताव गर्नसक्ने जनाइएको छ ।

४ बीएचके हाउसमा भान्छा घर, बाथरुम, बस्ने र खाने ठाउँ, लुगा धुने कोठा, पूजा कोठा र परिवार कोठाका साथै बालकनी र कोठरी हुने छन् ।विकासकर्ताहरुका अनुसार उनीहरुले सम्पत्तीको बुकिङ खुला गरिसकेकाले आवश्यकता अनुसार प्लट छनोट गर्न सक्ने छन् ।

‘यो अत्याधुनिक आवासीय कम्प्लेक्स सुरु गर्नुको मुख्य उद्देश्य जीविकोपार्जन र आरामदायी जीवनयापनको स्तर उकास्ने हो, सीई कन्स्ट्रक्सनका अध्यक्ष तथा प्रबन्ध निर्देशक विजय राजभण्डारीले भने, ‘हामीले पहिलो चरणको मात्रै थालनी गर्दैछौं । अर्को चरणमा अपार्टमेन्ट र कमर्शियल कम्प्लेक्सको निर्माण गर्दैछौं ।’

उनले माया कम्प्लेक्सलाई यस क्षेत्रको ल्यान्डमार्क बन्ने परिकल्पना गरेको पनि बताए । सीई कन्स्ट्रक्सन प्रालि २९ वर्षअघि स्थापित नेपालकै पुरानो रियल स्टेट कम्पनी हो ।