नेपाल बैंकको अध्यक्षबाट राजीनामा नदिँदै अर्थसचिव मरासिनीले लिए राष्ट्र बैंकको सञ्चालकको सपथ

काठमाडौं । राष्ट्र बैंक ऐन विपरीत अर्थसचिव मधु मरासिनीले राष्ट्र बैंकको सञ्चालकका रुपमा सपथ ग्रहण गरेका छन् । बुधबार अर्थसचिव मरासिनीले न्यायाधीश तेजबहादुर केसी समक्ष सपथ लिएका हुन् ।

मरासिनी गत साउन १८ गतेदेखि अर्थसचिवका रुपमा कार्यभार सम्हालेका हुन् ।

राष्ट्र बैंक ऐनअनुसार सरकारको प्रतिनिधिका रुपमा अर्थसचिव राष्ट्र बैंकको पदेन सञ्चालक रहने व्यवस्था छ ।

‘वाणिज्य बैंक तथा वित्तीय संस्थाको बाहलवाला पदाधिकारी भएको अवस्थामा सञ्चालक समितिमा बस्न अयोग्य हुनेछ,’ राष्ट्र बैंक ऐनको दफा २१ (घ)मा उल्लेख छ ।

केन्द्रीय बैंकको सञ्चालकमा ७ सदस्यीय सञ्चालक समिति रहने व्यवस्था छ । जसमा गभर्नर अध्यक्ष, सदस्यहरुमा अर्थमन्त्रालयका सचिव, दुई जना डेपुटी गभर्नर र आर्थिक, मौद्रिक, बैंकिङ, वित्तीय तथा वाणिज्य कानूनका क्षेत्रका लब्ध प्रतिष्ठित व्यक्तिबाट नेपाल सरकारले नियुक्त गरेका तीन जना सदस्य रहने व्यवस्था छ ।

वाणिज्य बैंकहरुको अध्यक्ष वा सञ्चालक रहेका व्यक्तिले राष्ट्र बैंकको सञ्चालकका हैसियतमा सपथ लिनु पूर्व नै पदबाट राजीनामा दिनुपर्ने व्यवस्था छ । तर हालसम्म नेपाल बैंकको अध्यक्ष मरासिनीको राजीनामा पत्र नेपाल स्टक एक्सचेञ्ज (नेप्स) मा प्राप्त नभएको सीइओ चन्द्रसिंह साउँदले जानकारी दिए ।

अर्थसचिव मारासिनी नेपाल बैंकका अध्यक्ष पनि हुन् । बैंकका तत्कालीन अध्यक्ष बासुदेव अधिकारीले राजीनामा दिएपछि मरासिनीले बैैंकको अध्यक्षका रुपमा कार्यभार सम्हालेका छन् ।

मरासिनी अर्थसचिव भएपछि बैंकको अध्यक्षबाट राजीनामा सञ्चालक समितिमा बुझाउनु पर्ने हुन्छ । तर उनको राजीनामा सञ्चालक समितिमा प्राप्त नभएको बैंकका सीइओ कृष्ण अधिकारीले क्लिकमाण्डूलाई बताए ।

‘अर्थसचिव भइसकेपछि राष्ट्र बैंकको पदेन सञ्चालक हुनुपर्छ, सपथ लिनुअघि सञ्चालक समिति समक्ष राजीनामा दिनुपर्ने हो,’ उनले क्लिकमाण्डूसँग भने, ‘अहिले सञ्चालक समितिको बैठक नै नबसेको अवस्थामा उनको राजीनामा आइसकेको छैन ।’