ऊर्जा मन्त्रीको निर्देशनको अवज्ञा, मिटर रिडिङ नगरी जरिवाना गर्दै प्राधिकरण
काठमाडौं । नेपाल विद्युत् प्राधिकरणले विभागिय मन्त्री एवम् सञ्चालक समितिका अध्यक्ष वर्षमान पुनको निर्देशन अवज्ञा गरेको पाइएको छ ।
मन्त्री पुनले केही दिन पहिले कुनै पनि उपभोक्तालाई विद्युत् महसुलमा जरिवाना नलिन निर्देशन दिएका थिए । उनको निर्देशनको अवज्ञा गर्दै विभिन्न जिल्लामा ग्राहकसँग जरिवाना उठाउन थालिएको छ ।
प्राधिकरणको निमित्त नेतृत्वले समेत जिल्लाका वितरण केन्द्रमा कुनै पनि प्रकारको निर्देशन नपठाएका कारण उपभोक्ता मर्कामा परेका छन् ।
उनीहरुले सञ्चार माध्यममा जरिवान नलिन भनिएको समाचार देखाएपनि वितरण केन्द्रका कर्मचारीले अटेर गरेको पाइएको छ ।
सोही क्रममा सर्लाहीको वितरण केन्द्र लालबन्दीले मिटर रिडिङ नगरिकनै जरिवाना असुलीएको भन्दै उपभोक्ताले गुनासो गरेका छन् ।
कोभिड–१९ नियन्त्रण गर्न भन्दै सरकारले लकडाउन गरेको समयमा उपभोक्ताको मिटर रिडिङ नगरी चुप बसेको वितरण केन्द्रले जरिवाना भन्दै उठेको रकममा थप १० प्रतिशत लिएको उपभोक्ताको गुनासो छ ।
उनीहरूले वितरण केन्द्रका कर्मचारीको मनलाग्दी खपत शुल्कमा जरिवानासमेत लिने गरेको लालबन्दीका उपभोक्ता श्याम लामाले बताए ।
विगत ५/६ महिना मिटर रिडिङ नगरी बसेको वितरण केन्द्रले लकडाउन अलि सहज भएपछि बिल तिर्न आउन सूचना नै जारी गरेर जरिवानासहित शुल्क असुलेको अर्का स्थानीय रमेश कार्कीको गुनासो गरे ।
विद्युत् वितरण केन्द्रका कर्मचारीले समयमा मिटर रिडिङ नगरेका कारण आमसर्वसाधारण आफ्नो घरमा रहेको बिजुलीको मिटरमा उठेको रकमको लकडाउनको समयको पनि जरिवाना तिर्न बाध्य भएका छन् ।
प्राधिकरणका कर्मचारीले समयमा मिटर रिडिङ नगरेको र आफूले पैसा तिर्दा मिटरमा उठेको रकमको जरिवानासमेत गरी तिर्नुपरेको उनीहरूको गुनासो छ ।
यो त उदाहरणका पात्र मात्र हुन् । लालबन्दीमा रहेको विद्युत् प्राधिकरण वितरण केन्द्रको लापर्वाहीका कारण वितरण केन्द्र माताहतका अधिकांश बिजुली उपभोक्ता समस्यामा परेका छन् ।
सरकारले लकडाउनको समयमा विद्युत् महशुलको जरिवाना नलिन भनेको भए पनि नेपाल विद्युत् प्राधिकरण वितरण केन्द्र लालबन्दीले मिटर रिडिङ नगरिकनै जरिवाना असुल्ने गरेको गुनासो आएको हो ।
शुरुशुरुमा समस्या आएको तर अहिले त्यो समस्या समाधान भइसकेको साथै सबै विकल्प दिइएको भए पनि उपभोक्ताले बेवास्था गरेका र सबैलाई जानकारी नभएका कारण पनि समस्या आएको विद्युत् प्राधिकरण वितरण केन्द्र लालबन्दीका प्रमुख सुधीरकुमार रायले बताए ।
पहिलाको निर्णयअनुसार असोज ६ गतेपछि जरिवाना लिने भनिएको र सोहीअनुसार जरिवाना लिएको तर फेरि विद्युत् प्राधिकरणले असोज २२ गतेसम्म जरिवाना नलिने निर्णय गरेपछि बीचमा लिएको जरिवाना खपत युनिटबाट घटाउने विद्युत् प्राधिकरणले निर्णय गरेको वितरण केन्द्रका प्रमुख रायले बताए ।
पुष्प दुलाल
