एसबिआई बैंकका अध्यक्ष सत्यनारायण चयन, डेपुटी गभर्नरबाट लिए सपथ

काठमाडौं । एसबिआई बैंक नेपालको संचालक समितिको बैठकले स्टेट बैंक अफ इण्डियालाई प्रतिनिधित्व गरी आएका संचालक बिआरएस सत्यनारायणलाई बैंक संचालक समितीको अध्यक्षमा सर्वसम्मत्तीबाट चयन गरेको छ ।

अध्यक्ष बि.आर.एस. सत्यनारायण, एस.बि.आई. को मुम्बई स्थित प्रधान कार्यालयको अन्तर्राष्ट्रिय बैंकिङ्ग समूहमा मुख्य महाप्रबन्धकको पदमा कार्यरत रही एसबिआई. का एशिया, अफ्रिका तथा अष्ट्रेलियामा रहेका बैंकिङ्गसँग सम्बन्धित मामिला हेर्छन् ।

नेपाल राष्ट्र बैंकका डेपुटी गर्भनर श्री शिवराज श्रेष्ठले बैंकका नवनियुक्त संचालक समितीका अध्यक्ष श्री बि.आर.एस. सत्यनारायणलाई नेपाल राष्ट्र बैंक, केन्द्रीय कार्यालय, बालुवाटारमा आज आयोजित एक समारोहबिच पद तथा गोपनीयताको शपथ ग्रहण गराए ।

सपथ ग्रहण कार्यक्रममा नेपाल राष्ट्र बैंकका निर्देशक नरेन्द्र सिंह विष्ट, का.मु. निर्देशकहरु श्री विरेन्द्र दत्त अवस्थी तथा नेपाल एसबिआई बैंकका निर्वतमान अध्यक्ष तथा एसबिआई. भारतका नायव प्रबन्ध संचालक सुजित कुमार बर्मा, बैंकका संचालकहरु आर.एस. रमेश, बाल कृष्ण श्रेष्ठ, अर्जुन कुमार गौतम, केशव राज आचार्य, एवं बैंकका प्रबन्ध संचालक तथा प्रमुख कार्यकारी अधिकृत अनुकूल भट्नागर, नायब सिईओ तथा प्रमुख संचालन अधिकृत श्री शुभकान्त कानूनगो, प्रमुख वित्तीय अधिकृत प्रियरंजन, प्रमुख कर्जा अधिकृत देवराज अधिकारी तथा बैंकका कम्पनी सचिव भिष्म नेउपाने लगायतको उपस्थिती रहेको थियो ।