यी ५ महिला जसले अर्बौं तलब खान्छन्

काठमाडौं । लिङ्गका आधारमा पारिश्रमिक तोक्ने प्रवृत्तिले धेरै समाजहरुमा जरो गाडेको छ । तर, कार्यकारी तहमा भने यस्ता भेदभाव नभए झैं लाग्छ ।

बिश्वको २०० जना उच्च पारिश्रमिक लिने कार्यकारीहरुको सूचीमा १७ जना महिलाहरु समावेश छन् । शुरुमा यो संख्या निकै सानो लाग्छ ।

तर, ‘फर्चुन ५००’ सिइओको सूचीमा २१ जनामात्र महिला कार्यकारी समावेश छन् भन्ने तथ्यलाई पनि हेक्का राख्ने हो भने यो संख्या त्यती सानो लाग्दैन ।
सबैभन्दा बढी तलब बुझ्ने महिला कार्यकारीको सूचीको पहिलो स्थानमा ‘ओरेकल’ को सह–कार्यकारी साफ्रा काट्ज पर्छिन् । उनले सन् २०१५ मा ५ करोड ७० लाख डलर पारिश्रमीक बुझिन् । यसमा तलब, सेयर लगायत सुबिधा समावेश छन् ।

उनी र उनका अन्य समकक्षी कार्यकारीहरुको पारिश्रमीकलाई अधिकाशं सेयरधनीहरुले बिरोध गरेका र त्यसको बिरुद्धमा मतदानसमेत गरेका थिए ।
यस सूचीको दोस्रो स्थानमा गुगलको ‘चिफ फाइनानसियल अफिसर’ रुथ पोरत छिन् । उनको कुल पारिश्रमिक ४ करोड १० लाख डलर थियो, जसमा ५० लाख डलर बोनस थियो ।

यो सूचीको तेस्रो स्थानमा जनरल मोर्टसकी प्रमुख कार्यकारी मेरी बारा छिन् । उनले सन् २०१५ मा ३ करोड ६० लाख डलर पारिश्रमीक बुझिन् ।

सूचीको चौथो स्थानमा लकहिड मार्टिनकी प्रमुख कार्यकारी मेरीलीन हिउसन छिन् । उनले सन् २०१५ मा २ करोड ८३ लाख पारिश्रमीक बुझिन् । लकहिड मार्टिन सुरक्षा प्रबिधि सम्बन्धि काम गर्ने अमेरिकी कम्पनी हो ।

सूचीको पाँचौ स्थानमा एन्जीला एहरेन्डट्स छिन् । उनी एप्पलको बरिष्ठ उपाध्यक्ष हुन् । उनले २ करोड ८० लाख डलर पारिश्रमीक बुझेकी थिइन् । उनी सन् २०१४ मा भने बिश्वमै बढि पारिश्रमीक बुझ्ने महिला कार्यकारीको सूचीमा पहिलो स्थानमा थिइन् । सन् २०१४ मा उनले बरबेरी भन्ने कम्पनीबाट एप्पल आउँदा ८ करोड १० लाख डलर बुझेकी थिइन् ।

उच्च कार्यकारी पदमा बस्ने महिलाहरु भने तल्लो तहकाले झैं भेदभाव पूर्णपारिश्रमिकको शिकार हुनु पर्दैन भन्ने कुराको पुष्टि यी तथ्यहरुले गर्छन् । विश्वका १०० ठूला सार्वजनिक कम्पनीका महिला कार्यकारीहरु आफ्ना पुरुष समकक्षीहरु भन्दा बढी पारिश्रमिक बुझ्छन् भन्ने बिभिन्न अध्ययनहरुले पनि पुष्टि गरेका छन् ।