‘हिलारी स्टेप’ नभत्किएको पर्वतारोहीहरुको दाबी

सोलुखुम्बु । सगरमाथाको आठ हजार मिटरमाथि रहेको ‘हिलारी स्टेप’ भत्किएको भन्ने खबर केही दिनदेखि विभिन्न सञ्चारमाध्ययममा आइरहेकामा सो कुरा  सत्य नभएको सगरमाथाका पथ प्रदर्शक पासाङ तेन्जिङ शेर्पाको दाबी छ ।

शेर्पासहित आरोहण गरेर फर्किएका दुई नेपाली आरोही र एक पर्वतारोहण अधिकारीले सगरमाथाको चुचुरो नजिकै रहेको हिलारी स्टेप पहिलेकै अवस्थामा रहेको बताएका हुन् ।

बाटो बनाउने काममासमेत संलग्न पथ प्रदर्शक शेर्पाले भने ‘यसपटक हामीले हिलरी स्टेपभन्दा छेउतिरको डिलैडिलमा बाटो बनाएका छौँ । त्यसैले हिलरी स्टेप नदेखिएर ती आरोहीलाई भ्रम परेको हुनसक्छ । हिलरी स्टेप जहाँ थियो र जस्तो थियो, त्यस्तै छ ।’

सगरमाथा आरोहण गरी फर्किएका अर्का पर्वतारोही लीला बस्नेतले हिलरी स्टेप हिउँले छोपिएको अवस्थामा रहेको बताए ।

नेपाल पर्वतारोहण सङ्घका अध्यक्ष आङछिरिङ शेर्पाले पनि हिलरी स्टेप नरहेको भन्ने खबर सत्य नभएको बताए। उनले भने, ‘भूकम्पका कारण हिलरी स्टेपमा कुनै असर परेको छैन । हिउँले गर्दा हिलरी स्टेपको सानो भाग मात्रै देखिन्छ, बाँकी भाग हिउँले छोपिएको अवस्थामा छ ।’

हिमपहिरो र भूकम्पका कारण सन् २०१४ र २०१५ आरोहण हुन नसकेपछि सन् २०१६ मा आरोहण खुलाउन केही रुट परिवर्तन गरिएका थिए । त्यस क्रममा‘हिलारी स्टेप’नाम दिइएको चट्टानबाट नभइ त्यही चट्टानको दाहिनेतिरबाट बाटो खुलाइएको थियो । यसपटक पनि गत वर्षकै बाटोलाई निरन्तरता दिइएको छ ।

करिब ८,००५ मिटर नजिक साउथ समिट आसपासका क्षेत्रलाई हिलरी स्टेपको नामले चिनिन्छ । पहिलो पटक सगरमाथाको चुचुरोमा पुगेका दुई आरोहीमध्येका एक सर एडमण्ड हिलरीको नाममा उक्त भागको नाम हिलरी स्टेप राखिएको थियो ।