भक्तपुरका भूकम्प प्रभावितलाई १ करोड ५३ लाख वितरण



नगरकोट । भूकम्प प्रभावितहरुको जीविकोपार्जनका लागि आयआर्जनमा सहयोग पुर्याउन नेपाल रेडक्रस सोसाइटी भक्तपुर जिल्ला शाखाले एक करोड ५३ लाख ९० हजार रुपैयाँ वितरण गरेको छ ।

भूकम्प प्रभावित प्रतिपरिवार पहिलो किस्तामा १० हजार रुपैयाँका दरले एक हजार ५३९ परिवारलाई सो रकम वितरण गरिएको रेडक्रसका जिल्ला सभापति मनोजकुमार थापाले बताए ।

रेडक्रसले जिल्ला प्रशासन कार्यालय, नगरपालिका, वडा कार्यालय, नागरिक वडामञ्चका संयोजक तथा स्थानीय बुद्धिजीवीको समन्वयमा साविक नगरकोट, चाँगुनारायण, अनन्तलिङ्गेश्वर र सूर्यविनायक नगरपालिकाका २१ वडामा  रकम वितरण गरिरहेको छ ।

सभापति थापाका अनुसार पहिलो चरणमा वितरित रकमको अनुगमन गरी त्यसको सदुपयोग भएको सुनिश्चितता  भएपछि दोस्रो चरणको रकम वितरण गरिनेछ । उहाँका अनुसार रकम प्राप्त गरेका भूकम्प प्रभावितहरुले आलुखेती, बाख्रापालन, बङ्गुरपालन, आधुनिक आरन सञ्चालन, पसल सञ्चालनलगायतका कार्य गरिरहेका छन् ।

अहिलेसम्म साविक चाँगुनारायण नगरपालिकाका वडा नं ४, ६, ९, ११ र १७, अनन्तलिङ्गेश्वर नगरपालिकामा १० र १३, नगरकोट नगरपालिकाको १, २, ३, ९ र १० वडामा पहिलो किस्ताको रकम वितरण भइसकेको छ ।