पुरानो मेडिकल कलेज भरतपुरले जर्मनबाट ल्यायो ५ वटा डायलासिस मेसिन, मिर्गौला रोगीको चाप बढ्दो

चितवन । पुरानो मेडिकल कलेज (सीएमएस) भरतपुरले डायलासिसका थप ५ वटा आधुनिक मेसिन सञ्चालनमा ल्याएको छ ।

अस्पतालमा मिर्गौला रोगीको चाप अत्यधिक बढ्दै गएका कारण पुरानो मेडिकल कलेजमा डायलासिसका ५ वटा मेसिन थप गरिएको हो । थप मेसिन सहित अव अस्पतालमा कुल १३ वटा डायलासिसका मेसिन सञ्चालनमा आएका छन् ।

कलेजका जनसम्पर्क तथा बजार विभाग प्रमुख दुर्गाप्रसाद न्यौपानेले मिर्गौलाका बिरामीहरुको चाप बढेपछि जर्मनबाट ५ वटा फ्रेसनेस डायलासिस मेसिन ल्याइएको बताए । उनलेभ भने-‘दुईवटा मेसिन मर्मतमा रहेको हुनाले अब पुरानो मेडिकल कलेजमा १५ वटा डायलासिस मेसिन सञ्चालनमा आउने छ ।’

पुरानो मेडिकल कलेजमा हाल दैनिक ३२ जनाले निःशुल्क डायलासिस गरिरहेका छन् । मेसिन थप भएर सञ्चालन गरेपछि दैनिक ४५ जनाको मिर्गौला डायलासिस गर्न सकिने कलेजले जनाएको छ ।

पुरानो मेडिकल कलेज २३ वर्षअघि भरतपुरमा स्थापना भएको मुलुककै पुरानो कलेज हो ।