ह्वाट्सएपमा ‘युजरनेम’ फिचर: अब फोन नम्बर बिना नै च्याट गर्न सकिने

एजेन्सी । ह्वाट्सएपले आफ्ना प्रयोगकर्ताहरूको गोपनीयतालाई थप सुदृढ बनाउन एउटा नयाँ र महत्वपूर्ण फिचर ल्याउने तयारी गरेको छ ।

यस नयाँ ‘युजरनेम’ फिचरको आगमनसँगै अब प्रयोगकर्ताहरूले कसैसँग कुराकानी गर्न वा नयाँ सम्पर्क जोड्नका लागि आफ्नो व्यक्तिगत फोन नम्बर साझा गर्नुपर्ने बाध्यता हट्नेछ ।

यो फिचर विशेष गरी ती प्रयोगकर्ताहरूका लागि उपयोगी हुनेछ जो आफ्नो नम्बर अपरिचित व्यक्ति वा सार्वजनिक समूहहरूमा सार्वजनिक गर्न चाहँदैनन् ।

यस फिचरअन्तर्गत, इन्स्टाग्राम वा एक्स (ट्विटर) मा जस्तै ह्वाट्सएपमा पनि प्रत्येक प्रयोगकर्ताले आफ्नो एउटा युनिक युजरनेम सेट गर्न पाउनेछन् । एक पटक युजरनेम सेट गरिसकेपछि, अरुले तपाईँको फोन नम्बरको सट्टा सोही युजरनेम खोजेर तपाईँलाई सन्देश पठाउन सक्ने कम्पनीले जनाएको छ ।

यसले गर्दा प्रयोगकर्ताको प्राथमिक पहिचानका रूपमा रहेको फोन नम्बर गोप्य रहनेछ र सञ्चार थप सुरक्षित हुनेछ।

गोपनीयताको हिसाबले यो फिचरलाई ठूलो फड्को मानिएको छ ।युजरनेममार्फत गरिने कुराकानीहरू पनि ह्वाट्सएपको ‘इन्ड-टु-इन्ड इन्क्रिप्सन’ प्रविधिद्वारा सुरक्षित रहनेछन्, जसको अर्थ ती सन्देशहरू पठाउने र पाउने व्यक्ति बाहेक तेस्रो पक्ष वा स्वयम् ह्वाट्सएपले पनि पढ्न सक्ने छैन ।

यसले गर्दा प्रयोगकर्ताहरूले आफ्नो व्यक्तिगत जानकारी सुरक्षित रहेको महसुस गर्दै निर्धक्क भएर कुराकानी गर्न सक्नेछन्।

कम्पनीका अनुसार, हाल यो फिचर विकासको चरणमा रहेको र एन्ड्रोइडको ‘बेटा भर्सन’मा परीक्षण भइरहेको छ । परीक्षण सफल भएपछि यसलाई चाँडै नै विश्वभरका एन्ड्रोइड र आईओएस प्रयोगकर्ताहरूका लागि उपलब्ध गराइनेछ ।