एजेन्सी । भारतका प्रधानमन्त्री नरेन्द्र मोदी देशमा सबैभन्दा लामो समयसम्म सेवा गर्ने निर्वाचित प्रधानमन्त्री बनेका छन् ।
सन् २०१४ मा पहिलोपटक निर्वाचित भएका प्रधानमन्त्री मोदीले ४३ सय ९९ दिनको अविच्छिन्न कार्यकालका साथ प्रथम प्रधानमन्त्री जवाहरलाल नेहरूको रेकर्ड तोड्दै सबैभन्दा लामो समय सेवा गर्ने प्रधानमन्त्री बनेका हुन् ।
सन् १९५२ मा पहिलोपटक उक्त पदमा निर्वाचित भएका नेहरूले १३ मे मा पदको शपथ लिएका थिए र २७ मे १९६४ सम्म सेवा गरेका थिए, जुन ४३ सय ९८ दिनको कार्यकाल थियो । सन् १९४७ देखि १९५२ सम्मको उनको अघिल्लो कार्यकाल अन्तरिम सरकारको प्रमुखका रूपमा थियो किनभने त्यतिबेला निर्वाचनलाई संस्थागत र आयोजना गर्न बाँकी नै थियो ।
इन्दिरा गान्धीको सन् १९६६ देखि १९८४ सम्म १४ वर्षको कार्यकाल टुक्रिएको (अविच्छिन्न नरहेको) थियो । सन् १९७७ मा संकटकाल हटेपछि भएको आम निर्वाचनमा उनी पराजित भएकी थिइन् ।
रक्षामन्त्री राजनाथ सिंहले प्रधानमन्त्री मोदीलाई बधाई दिँदै यस उपलब्धिलाई भारतका जनताले उनको नेतृत्वमा देखाएको अटुट विश्वासको प्रमाण भएको बताएका छन् ।
‘भारतको इतिहासमा सबैभन्दा लामो समयसम्म सेवा गर्ने निर्वाचित प्रधानमन्त्री बनेर ४३ सय ९९ दिन पूरा गर्नुभएकोमा श्री नरेन्द्र मोदीजीलाई बधाई छ । ‘राष्ट्र प्रथम’ को सिद्धान्तबाट निर्देशित अथक कर्मयोगी, उनको कार्यकालले भारतप्रतिको अटल समर्पण, जनताको कल्याणप्रतिको दृढ प्रतिबद्धता र राष्ट्रको सेवामा परिवर्तनकारी नेतृत्वलाई प्रतिबिम्बित गर्छ,’ सिंहले एक्समा लेखेका छन् ।
‘यो उपलब्धि भारतका जनताले उनको नेतृत्वमा राखेको दिगो विश्वास र समावेशी विकास र सुशासनका लागि उनको अथक प्रयासको प्रमाण हो । विगत १२ वर्षमा भारतले विकास र विश्वव्यापी नेतृत्वमा उल्लेखनीय प्रगति गरेको छ, साथै सभ्यताको पुनर्जागरण पनि अनुभव गरेको छ । यसले राष्ट्रलाई थप आत्मविश्वासी, दृढ र आफ्नो सम्पदामा आधारित बनाएको छ,’ उनले थपे ।
‘भारत विकसित भारतको लक्ष्यतर्फ अघि बढ्दै गर्दा प्रधानमन्त्री मोदीले राष्ट्रलाई थप समृद्धि, प्रगति र विश्वव्यापी प्रख्यातितर्फ नेतृत्व गरिरहनुभएको छ,’ उनले भने ।
प्रतिक्रिया