ट्रम्पको चीन भ्रमण, अहिलेसम्म के के भयो ?

एजेन्सी । बेइजिङमा बिहीबारको दिन निकै महत्त्वपूर्ण र व्यस्त रह्यो ।

चीनका राष्ट्रपति नेता सी चिनपिङले आफू र अमेरिकाका राष्ट्रपति डोनल्ड ट्रम्प रचनात्मक रणनीतिक स्थिर सम्बन्ध स्थापना गर्न सहमत भएको बताएका छन् ।

यो पछिल्ला वर्षहरूमा निरन्तर बिग्रँदै गएको अमेरिका–चीन सम्बन्धलाई सुधार गर्ने एक उल्लेखनीय प्रयास हो ।

दुवै नेताहरूका लागि अझै एउटा राजकीय भोज र भोलि अर्को चरणको वार्ता बाँकी नै छ ।

सीद्वारा नयाँ युगको घोषणाः चिनियाँ परराष्ट्र मन्त्रालयको विज्ञप्ति अनुसार, दुई नेताहरू आगामी तीन वर्ष र त्यसभन्दा पछिका लागि द्विपक्षीय सम्बन्धको नयाँ दिशाका रूपमा रचनात्मक रणनीतिक स्थिर सम्बन्ध स्थापना गर्न सहमत भएका छन् ।

सीका अनुसार, यो सम्बन्ध सहयोग, व्यवस्थित प्रतिस्पर्धा र मतभेदहरूका बावजुद स्थायी स्थिरताद्वारा परिभाषित हुनुपर्छ । अमेरिकाले भने यस बैठकको आफ्नो आधिकारिक विवरण सार्वजनिक गर्न बाँकी छ ।

व्यापारका सम्बन्धमाः विज्ञप्ति अनुसार, ट्रम्प र सीबीचको वार्ताअघि बुधबार भएको दुई देशका आर्थिक र व्यापारिक टोलीहरूको छलफलले समग्रमा सन्तुलित र सकारात्मक परिणाम निकालेको छ ।

अन्य सहयोगका क्षेत्रहरूः मन्त्रालयका अनुसार, सीले अमेरिका र चीनले व्यापार, स्वास्थ्य, कृषि, पर्यटन, जनस्तरको आदानप्रदान र कानुन कार्यान्वयन लगायतका अन्य क्षेत्रहरूमा पनि सहयोग गर्नुपर्ने बताए । दुवै पक्षले राजनीतिक र कूटनीतिक च्यानलका साथै सैन्य सञ्चार संयन्त्रको पनि राम्रो प्रयोग गर्नुपर्नेमा उहाँले जोड दिए ।

ट्रम्पको भनाइः सीसँग कुरा गर्दै ट्रम्पले ‘हाम्रो शानदार भविष्य हुनेछ ।’

ताइवानको मुद्दाः सीले ‘ताइवानको प्रश्न चीन–अमेरिका सम्बन्धको सबैभन्दा महत्त्वपूर्ण मुद्दा हो’ भन्ने कुरामा जोड दिए । यस मुद्दालाई उचित रूपमा सम्बोधन गरियो भने सम्बन्ध स्थिर रहन सक्ने उनले चेतावनी दिँदै भने ।

तर, गलत व्यवस्थापन भएमा यसले द्वन्द्व निम्त्याउन सक्छ जसले अत्यन्तै खतरनाक स्थिति सिर्जना गर्नेछ । ताइवानले पनि तुरुन्तै प्रतिक्रिया दिँदै चीन नै यस क्षेत्रमा असुरक्षाको एकमात्र स्रोत भएको आरोप लगाएको छ ।

विश्वव्यापी द्वन्द्वहरूः सरकारी समाचार एजेन्सी सिन्ह्वाका अनुसार, दुई नेताहरूले पश्चिम एसियाको अवस्था लगायत प्रमुख अन्तर्राष्ट्रिय र क्षेत्रीय मुद्दाहरूमा विचार आदानप्रदान गरे । उनीहरूबीच युक्रेन युद्धको बारेमा पनि कुराकानी भएको एजेन्सीले जनाएको छ ।

भव्य स्वागत र भ्रमणः बिहानको सुरुवात ग्रेट हल अफ द पिपलमा भव्य स्वागत समारोहबाट भयो जहाँ दुई नेताहरूले औपचारिक वार्ता गरे । त्यसपछि उनीहरूले युनेस्को विश्व सम्पदा सूचीमा रहेको टेम्पल अफ हेभनको भ्रमण गरे ।

भाइरल क्षणहरूः सामाजिक सञ्जालमा केही रमाइला दृश्यहरू भाइरल भएका छन् जसमा विदेशमन्त्री मार्को रुबियोले ग्रेट हलभित्रको छतलाई अचम्म मान्दै हेरेको र टेक अर्बपति इलोन मस्कले आफ्नो फोनबाट फोटो वा भिडियो खिच्दै गोलो घुमेको दृश्य समावेश छ ।