राष्ट्रपति कार्यालयमा प्रधानमन्त्री र जेनजी समूहबीच छलफल जारी

काठमाडौं । प्रधानमन्त्री सुशीला कार्कीसँग मुलुकको समसामयिक राजनीतिक परिस्थिति, जेनजीका माग सम्बोधन र आसन्न निर्वाचनलगायत विषयमा जेनजी समूहका प्रतिनिधिसँग आज राष्ट्रपति कार्यालयमा छलफल भएको छ ।

राष्ट्रपति रामचन्द्र पौडेलको आह्वानमा जारी छलफलमा प्रधानमन्त्री कार्की मन्त्री र जेनजी समूहका प्रतिनिधि सुदन गुरुङ, प्रवेश दाहाल, मिराज ढुङ्गानालगायत सहभागी छन् ।

छलफलमा सुशासन, संविधान संशोधनलगायत विषयमा जेनजी समूहका प्रतिनिधिले आफ्ना धारणा प्रस्तुत गरेका छन् ।

आगामी निर्वाचनमा केन्द्रित भएर विघटित प्रतिनिधिसभामा प्रतिनिधित्व गरेका राजनीतिक दलका नेताबीच शुक्रबार राष्ट्रपति भवनमा छलफल भएको थियो । युवाहरूको आन्दोलनपछि जेनजी समूहका प्रतिनिधिसँग राष्ट्रपति भवनमा पहिलोपटक छलफल भएको हो ।

छलफलमा राष्ट्रपति पौडेल सहभागी हुने भनिए पनि स्वास्थ्यको कारणले उनी सहभागी भएनन । त्यसपछि छलफलमा प्रधानमन्त्री कार्कीसँग जेनजी प्रतिनिधीको छलफल भइरहेको छ । केहि जेनजी समूहले आफुहरुलाई उक्त वार्तामा सहभागी नगराएको भन्दै राष्ट्रपति कार्यालय बाहिर नारा लगाएका थिए ।