भिजिट भिसाको नाममा अवैध काम भएको भन्दै संसदमा भएको विराेधका कारण यूएई सरकारले गत जनावरीदेखि नै कडाइ गर्दै आएको थियो । जसका कारण वार्षिक ४० हजार जनासम्मम जाने गरेको यूएईमा यो वर्ष १० हजारको हारहारीमा मात्रै नेपाली भिजिट भिसाबाट घुम्न जाने अनुमान भएकोमा अब त्याे पनि बन्द हुने आकलन गर्न थालिएको छ ।
काठमाडौं । संयुक्त अरब इमिरेट्स (यूएई)ले नेपालीलाई भिजिट भिसा दिन अनौपचारिक रुपमा रोकेको छ । सोमबारदेखि नै यूएईले नेपालीलाई भिजिट भिसा दिन रोकेपछि त्यहाँको ट्राभल एजेन्सीले नेपाली ट्राभल तथा टुर व्यवसायीलाई प्याकेज बिक्री नगर्न सर्कुलर जारी गरेको छ ।
नेपालबाट टूर प्याकेज बिक्री गरिरहेको एक ट्राभल एजेन्सीका अनुसार सोमबारदेखि नेपाली नागरिकलाई भिसा सेवा निलम्बन गरेको जानकारी सर्कुलरमार्फत गराएको छ ।
अर्को सूचना नआएसम्मको लागि नेपाली नागरिकहरुलाई सबै प्रकारका भिसा दिने काम रोकिएको उल्लेख छ । अर्को सूचना जारी नभएसम्मको लागि नेपाली नागरिकलाई कुनै पनि भिसा थप नगर्न र थपको आवेदन नदिन समेत आग्रह गरेको छ ।
यूएईले नेपालीलाई भिजिट भिसामा दिन रोक लगाएसँगै हाल बिक्री भइसकेको बाहेक अब नयाँ प्याकेजबाट पठाउन समस्या हुने भएको छ । नेपाल एसोसिएसन अफ टुर एण्ड ट्राभल एजेन्ट्स (नाट्टा)का वरिष्ठ उपाध्य जिस्वाँ तुलाधरका अनुसार भिजिट भिसाको इस्यु आएको कारण गत जनावरीदेखि नै यूएईले नेपालीलाई कडाई गर्दै आएको थियो । सरकारको कारण कम भएको भिजिट भिसा सोमबारदेखि भने जारी नै नगर्न सर्कुलर आएको पनि उनले क्लिकमान्डुलाई बताइन् ।
तुलाधरका अनुसार तत्काललाई भिजिट भिसा होल्ड गर्न भनिएको छ । जसका कारण भिसा लगाइसकेका र टिकेटिङसमेत भइसकेको नेपालीबाहेक नयाँ जारी हुने तयारीमा रहेका र बुकिङ भएकाको हकमा भने अस्वीकार हुने देखिएको छ ।
भिजिट भिसा नदिएपछि ट्राभल एजेन्सीले जारी गर्ने टिकेटमा पनि असर पर्ने भएकोले यूएईका वायुसेवा कम्पनीहरु फ्लाई दुवई र एयर अरेवियालाई आफूले इमेल गरिसकेको र त्यसको जवाफ आइनसकेको पनि तुलाधरले जानकारी दिइन् । एयरलाइन्स कम्पनीले के हुने भन्ने जानकारी दिनुपर्ने र टिकेटिङमा एयरलान्सले सहजीकरण गर्नुपर्ने भएकोले स्पष्ट हुन इमेल लेखेको पनि उनको भनाइ छ ।
विगतका वर्षहरुमा वार्षिक ४० हजारको हाराहारीमा नेपाली भिजिट भिसामा युएई पुग्ने गरेका थिए । दशैं तिहारसहित पर्यटकीय सिजनमा प्याकेज लिएर जाने ती पर्यटक सरकारकै भिजिट भिसाको इस्युका कारण ७० प्रतिशतले घटेर यो वर्ष १० हजार पनि नपुग्ने अवस्थामा पुगेको थियो । त्यसमा पनि अब जारी नगर्नु भन्ने सर्कुलरका कारण ठप्पै हुने अवस्था आएको पनि नाट्टाका वरिष्ठ उपाध्यक्ष तुलाधरको भनाइ छ ।
यूएईको पनि शारजाहबाट मात्रै ७५ प्रतिशत भिजिट भिसाको काम हुने गरेको छ । सोही कारण सारजाहबाट नेपाल आउने वायुसेवा कम्पनीले ट्राभल एजेन्सीलाई सहजीकरण गनुपर्ने भनाइ पनि सम्बन्धित नेपाली ट्राभल एजेन्सीको भनाइ छ ।
वर्षेनी दशैं तिहारको विदासहितमा नेपालबाट तुलाधरको स्वाँ टूर्स एण्ड ट्राभलबाट मात्रै वर्षभरीमा ५ सय नेपाली भिजिट भिसामा प्याकेज सहित घुम्न जाने गरेकोमा यो वर्ष भने एक सय जना पनि नपुग्ने अवस्था देखएको उनको भनाइ छ ।
प्रतिक्रिया