आज सार्वजनिक बिदा

काठमाडौं । पूर्वसभामुख दमननाथ ढुंगानाको निधनको शोकमा सरकारले आज सार्वजनिक बिदा दिने निर्णय गरेको छ ।

आज बिहान प्रधानमन्त्री निवास बालुवाटारमा बसेको मन्त्रिपरिषद बैठकले सार्वजनिक बिदा दिने निर्णय गरेको सरकारका प्रवक्ता तथा सूचना तथा सञ्चार प्रविधिमन्त्री पृथ्वीसुब्बा गुरुङले जानकारी दिए ।

उनका अनुसार सरकारले पूर्वसभामुखढुंगानाको निधनमा आज सोमबार शोक मनाउन सार्वजनिक बिदा दिने निर्णय गरेको हो ।साथै सरकारले नेपालका सरकारी कार्यालय र विदेशस्थित नेपाली कुटनीतिक नियोगहरुमा राष्ट्रिय झण्डा आधा झुकाउने निर्णय गरेको छ ।

ढुंगानाको आइतबार दिउँसो उपचारको क्रममा निधन भएको थियो । ढुंगानाको आज पशुपति आर्यघाटमा राष्ट्रिय सम्मानका साथ अन्त्येष्टि गरिँदै छ ।

अन्त्येष्टि अघि ढुंंगानालाई सानो गौचरणमा श्रद्धाञ्जली सभाका लागि राखिनेछ । साढे ११ बजे हुने श्रद्धाञ्जली सभामा प्रधानमन्त्री केपी शर्मा ओली पनि सहभागी हुने सञ्चारमन्त्री गुरुङले बताए ।

माओवादी र सरकारबीचको शान्तिवार्तामा सहजकर्तासमेत रहेका ढुंगाना २०४८ सालदेखि २०५१ सालसम्म सभामुखका रुपमा रहेका थिए ।