सरकारले तयार पार्यो डेटा सुरक्षा सम्बन्धी मापदण्ड
काठमाडौं । सरकारले डेटा सुरक्षा सम्बन्धी मापदण्ड तयार पारेको छ । सञ्चार तथा सूचना प्रविधि मन्त्रालयकी सचिव राधिका अर्यालले यसबारे जानकारी दिएकी हुन् ।
नेपाल उद्योग परिसंघले बुधवार काठमाडौंमा आयोजना गरेको एक कार्यक्रममा बोल्दै उनले आईटी पार्क, नलेज पार्क निर्माणको काम पनि मन्त्रालयले सुरु गरेको बताइन् ।
आर्टिफिसियल इन्टेलिजेन्स सम्बन्धी अवधारणा पत्र स्वीकृत गरेर मन्त्रालयले त्यसको नीति बनाउने काम पनि सुरु गरेको सचिव अर्यालको भनाइ थियो । सञ्चार क्षेत्रलगायतका लागि आवश्यक नीति निर्माणको काममा सरकार लागि परेकाले त्यसमा सहयोग गर्न पनि सम्बन्धित सबै पक्षसँग उनले अपिल गरेकी थिइन् ।
सचिव अर्यालले भनिन्,‘खासगरी एआई (आर्टिफिसियल इन्टेलिजेन्स) सम्बन्धी अवधारणापत्र स्वीकृत गरेर यसको नीति बनाउने काम सुरु भइसकेको छ । डिजिटल नेपाल फ्रेमवर्क परिमार्जनको क्रममा रहेको छ । डेटा सुरक्षा सम्बन्धी मापदण्ड तयार भइसकेको छ । त्यसैगरी आइटीपार्क नलेज पार्क सम्बन्धी कार्यविधिहरु बनाएर यसको काम अघि बढेको म यहाँ संक्षिप्तमा जानकारी गराउन चाहन्छु ।’
यससँगै सूचना प्रविधिको क्षेत्रमा डिजिटल फाउण्डेसनको क्रममा धेरै ठूलो उपलब्धि हासिल भएको पनि उनको भनाइ थियो । ‘अहिलेको आवश्यकता भनेको सरकार निजी क्षेत्रको लगानीमार्फत यो प्रविधि अधिकतम उपयोग गर्नु अहिलेको आवश्यकता हो । यसका लागि म निजी क्षेत्रलाई हार्दिक अनुरोध गर्न चाहन्छु । ऐन, कानून निर्माणमा सबैको सहयोगका लागि पनि म अपिल गर्न चाहन्छु ।’
सचिव अर्यालले सरकारले सूचना प्रविधिमा सबैको पहुँच पुर्याउने काम गरेको उल्लेख गर्दै त्यसको अधिकतम उपयोग गर्न पनि निजी क्षेत्रलाई आग्रह गरिन् ।
क्लिकमान्डु
