राजस्वको बजार अनुगमनः ४ दिनमा ३०२ ब्यापारी कारबाहीमा

काठमाडौं । आन्तरिक राजस्व विभाग अन्तरगतका कार्यालयहरुले थालेको बजार अनुगमनमा ठूलो संख्यामा ब्यापारीहरु कारबाहीमा परेका छन् । गत भदौ २७ गतेदेखि थालिएको बजार अनुगमनमा ४ दिनमै ३ सयभन्दा बढी ब्यापारिक फर्म कारबाहीमा परेका हुन् ।

आन्तरिक राजस्व विभागले दिएको जानकारी अनुसार ४ दिनमा १ हजार ९ सय ५१ ब्यापारिक फर्मको अनुगमन गरिएको छ । सो अनुगमनमा विलविजक जारी नगर्ने, खरिद तथा विक्री खाता अद्याबधिक नगर्ने जस्ता कैफियत भेटिएका ३०२ ब्यापारिक फर्म कारबाहीमा परेका विभागको भनाइ छ ।

विभाग अन्तरगतका ३६ वटा कार्यालयले भदौ २७ गतेदेखि बजार अनुगमन सुरु गरेका हुन् । प्रत्येक कार्यालयबाट ३÷३ वटा टोली परिचालन गरिएको विभागले जनाएको छ । बजार अनुगमन विभागको नियमित कार्य भएको जनाउंदै दशैं, तिहार जस्तो चाडवाडको समयमा बढी कारोवार हुने र सो क्रममा विल विजक जारी नहुने गुनासो धेरै तिरबाट आउने भएकोले गत वर्ष जस्तै यस वर्ष पनि बजार अनुगमनलाई तिव्रता दिइएको विभागको भनाइ छ ।

कर कार्यालयहरुका भदौ २७ गते मात्रै ८४ वटा अनुगमन टोलीले ३८५ वटा करदाताको अनुगमन गरी ४० वटा करदाताहरुलाई कारोवार स्थलमै तत्काल कानूनी कारवाही गरेका थिए । त्यसैगरी भदौ २८ गते ५३ वटा टोलीले ५६६ वटा करदाताको कारोवार स्थल आकस्मिक रुपमा अनुगमन गरेकोमा ११० वटा करदाताहरुले कर कानून परिपालना नगरेको पाइएकोले ती करदातालाई प्रचलित कर कानून बमोजिम जरिवाना गरेको विभागले जनाएको छ ।

यस्तै भदौ २९ गते ५२ वटा अनुगमन टोलीले ५५३ वटा करदाताको अनुगमन गरेकोमा ८३ वटा करदाताहरुलाई प्रचलित कानून बमोजिम जरीवाना गरिएको छ । भदौ ३० गते ४५ वटा टोलीले ४४७ वटा करदाताको अनुगमन गरेर ६९ करदातालाई कारवाही गरेको र विगत चार दिनमा २३४ टोलीबाट १९५१ वटा करदाताको अनुगमन गरी कर कानून पालना नगर्ने ३०२ करदातालाई जरिवाना तथा अन्य कानुनी कारवाही गरेको विभागले जानकारी दिएको छ ।

अनुगमनका क्रममा अन्तःशुल्क स्टिकर नलगाइएका गुट्खा तथा इजाजत नलिई कारोवार गरेको मदिरा र अन्तःशुल्क स्टिकरको प्रयोग नभएको मदिरा बरामद गरिएको विभागको भनाइ छ । अनुगमन टोलीले नक्कली स्टिकरको प्रयोग, अवैध मदिराको प्रयोग, करपाटी नराख्ने, विवरणहरु पेश नगर्ने, खाता अद्यावधिक नगरिएको, दर्ता नगरी कारोवार गरेको, घरबहाल कर दाखिला नगरेको, विल विजकको प्रयोग नगरिएको जस्ता क्रियाकलाप गरेको फेला पारेकोले कानूनी कारवाही गरेको हो ।

अनुगमनका क्रममा कर अधिकृत नेतृत्वको टोलीले व्यवसायीहरुलाई कार्यस्थलमा नै करदाता शिक्षा प्रदान गर्नुका साथै कर कानुनको पालना गर्न सुझाव समेत दिएको छ । कर अधिकृतको नेतृत्वमा खटिएको टोलीले कारवाहीमा परेका र थप शंकास्पद देखिएका करदाताहरुलाई थप अनुसन्धानका लागि खरीद विक्री खाता नियन्त्रणमा लिएर कार्यालयमा उपस्थित हुन पत्राचार समेत गरेको विभागले जनाएको छ । आन्तरिक राजस्व विभागले बजारमा विलविजक जारी नगर्ने करदाताको व्यवहारमा सुधार नभएमा अझ कडा रुपमा प्रस्तुत हुने चेतावनी दिनुका साथै बजार अनुगमनलाई वर्षैभरी निरन्तरता दिने जनाएको छ ।