एक सातामा जुम्लामा २ करोड २५ लाखको स्याउ बिक्री

जुम्ला । एक सातायता जिल्लामा २ करोड २५ लाख बराबरको स्याउ बिक्री भएको छ ।

यतिबेला यहाँका व्यापारीले बिक्रीका लागि स्याउ अन्य जिल्ला पठाउन थालेका छन् । अहिलेसम्म जिल्लाबाट ५४२ मेट्रिक टन स्याउ विभिन्न जिल्ला पठाइएको जिल्ला कृषि विकास कार्यालयले जनाएको छ ।

व्यापारीले किसानको बगैँचामै गएर स्याउ प्रतिकिलो ६० का दरले खरिद गर्न थालेका छन् । चन्दननाथ नगरपालिका–१० का छक्कबहादुर शाही बगैँचाबाटै तीन लाखभन्दा बढीको स्याउ बिक्री गरेको बताए ।

सोही वडाकै सरस्वती देवकोटा लगानीअनुसारको आम्दानी गर्न सफल भएको बताउनुहुन्छ । स्याउमा चमेरो, अरिङ्गाल, कोइरालोलगायतले क्षति पुर्याउन थालेको हुँदा चाँडै बेच्नु परेको उनको भनाइ छ । सुर्खेत र नेपालगञ्जमा स्याउको मूल्य ह्वात्तै घटेकाले व्यापारी मारमा परेका छन् । ग्रेडिङ र प्याकेजिङ बिना स्याउ धमाधम बिक्री हुन थालेको छ । ग्रेडिङ नगरिएको स्याउले उचित मूल्य नपाउँदा व्यापारी चिन्तामा छन् ।

जिल्ला सहकारी संघमा रहेको ८० लाखको ग्रेडिङ मेसिन सञ्चालनमा आउन सकेको छैन । दिनहुँ हातले नै स्याउ ग्रेडिङ गर्नु परिरहेको व्यापारी रामकृष्ण चौलागार्इंले बताउनुभयो । उहाँले ६५ मेट्रिक टन स्याउ खरिद गरे । करिब २५ मेट्रिक टन कमसल स्याउ भेटिएको छ । जुम्लामा प्रतिकिलो ६० मा खरिद गरिएको स्याउ काठमाडौँमा १२० मा बिक्री गर्ने सम्झौता भएको चौलागाईंले बताए । उनले करिब ३५ लाखको स्याउ खरिद गरे ।

भदौ पहिलो साताभित्रै जुम्लाका ९० प्रतिशत स्याउका बगैँचा रित्तिएका छन् । पञ्चेश्वर बहुउद्देश्यीय सहकारी संस्थाका अध्यक्ष मीनबहादुर डाँगी व्यापारीले अत्याएका कारण स्याउ पूर्ण रुपमा तयार हुन नपाएको बताए । आगामी वर्षमा यसबारे कृषक सचेतना कार्यक्रम सञ्चालन गर्नुपर्ने बताए । रासस