दुई करोड रुपैयाँको लागतमा जनस्वास्थ्य कार्यालयको भवन निर्माण

म्याग्दी। म्याग्दीको बेनीमा करिब दुई करोड रुपैयाँको लागतमा जनस्वास्थ्य कार्यालयको भवन निर्माण भएको छ ।

सहरी आवास तथा भवन निर्माण डिभिजन कार्यालय बागलुङले ठेक्कामार्फत एक करोड ८७ लाख रुपैयाँको लागतमा २० कोठे भवन निर्माण गरेको हो । २०७० असोजमा २०७२ असार मसान्तसम्म सक्ने लक्ष्यसहित भवन निर्माण सुरु भएको थियो ।

लक्ष्यभन्दा दुई वर्ष ढिला निर्माण भएको तीन तले भवन गत हप्ता हस्तान्तरण भएको जिल्ला स्वास्थ्य प्रमुख डाक्टर रोशन न्यौपानेले बताए। भूकम्प प्रतिरोधी क्षमताको सो भवनको भुइँ तला अपाङ्गमैत्री छ ।

भूकम्प, नाकाबन्दी र मजदुर अभावका कारण भवन निर्माणमा ढिलाइ भएको कम्पनीका प्रतिनिधिको भनाइ छ ।

यसैबीच सहरी आवास तथा भवन निर्माण डिभिजन कार्यालय बागलुङले बेनी अस्पतालको ५० शैय्या क्षमताको भवन निर्माण सुरु गरेको छ । १८ करोड १९ लाख रुपैयाँमा ठेक्का सम्झौता गरेको रफिना–गल्वा–महादेव खिम्ती जेभीले भवन निर्माणका लागि प्रारम्भिक काम सुरु गरेको हो ।

सम्झौताअनुसार तीन वर्षमा भवन निर्माण सम्पन्न गर्ने लक्ष्य रहेको छ । हाल अस्पतालले प्रयोग गरिरहेको भवन रहेको ठाउँमा नयाँ भवन निर्माण हुन लागेको हो । अस्पताल परिसरको खाली जग्गामा अस्थायी भवन र जनस्वास्थ्य कार्यालयको भवनबाट सेवा सञ्चालन गरिने अस्पताल विकास समितिका अध्यक्ष माधव रेग्मीले बताए ।

६५ लाख रुपैयाँमा ठेक्का पाएको शेर्पा कन्ट्रक्सनले दुई वटा अस्थायी भवन बनाउन सुरु गरेको छ । भदौ अन्तिमसम्म अस्थायी भवन निर्माण सम्पन्न गर्ने कम्पनीले जनाएको छ । अस्थायी भवन तयार पारेपछि पुरानो भवन भत्काएर नयाँ निर्माणको काम सुरु हुने जनाइएको छ ।