कालिञ्चोक मन्दिर जाने पदमार्ग पुनःनिर्माण

चरीकोट। दोलखाको कालिञ्चोक गाउँपालिका–६ मा पर्ने कालिञ्चोक भगवती मन्दिर जाने पदमार्ग नेपाली सेनाको चरीकोटमा रहेको रणभीम गणले निर्माण गरेको छ ।

धार्मिक र प्राकृतिक क्षेत्र कालिञ्चोक पुग्ने घ्याङडाँडा—कालिञ्चोक पदमार्ग भूकम्पले जताततै भत्काएपछि सेनाले पुनःनिर्माण गरेको हो ।

उकालो बाटो हिँडेर पुगिने मार्गभन्दा करिब एक घन्टा कम समय लाग्ने र हिँड्न सजिलो मार्ग भत्किएपछि हिँड्न नसक्ने र बूढापाकालाई कालिञ्चोकको टुप्पामा पुगेर भगवतीको दर्शन गर्न निकै कष्ट हुने गरेको थियो ।

सजिलो मार्ग भन्दै जबरर्जस्ती भत्केको बाटो जानेहरु पनि भिरबाट लडिने त्रासले त्यसै फर्किने गरेको कुरीका होटल व्यवसायी चन्द्रबहादुर तामाङले बताए । उक्त मार्गको सास्तीपूर्ण यात्रा बेहोरिरहेको देखेपछि गणले पदमार्ग निर्माण अभियान सम्पन्न गरी कालिञ्चोक गाउँपालिकालाई सोमबार हस्तान्तरण गरेको छ ।

नेपाली सेनाका बाहिनीपति जितबहादुर गुरुङले कालिञ्चोक गाउँपालिका अध्यक्ष विनकुमार थामीलाई पदमार्ग निर्माण सम्पन्न भएको प्रमाण बुझाएका थिए ।

सदरमुकामबाट १७ किमी सडक पनि सुधारका क्रममा रहेको र मन्दिर रहेको टुप्पामा पुग्ने दुवैतर्फको बाटो सुरक्षित बनाउन गण क्रियाशील छ ।  गणले जिल्ला समन्वय समितिसँग पाँच लाख ५० हजार रुपैयाँ र  दोलखाका सहयोगीबाट करिब ६० हजार रुपैयाँको निर्माण सामग्री लिएर बाँकी आफ्नै श्रमदानमा बाटो निर्माण गरेको गणपति झवीन्द्ररेश्मी मगरले बताए।

उक्त रकमबाट खुड्किला,फलामको पुल र बार तथा पहिरो रोकथामका लागि पर्खाल लगाइएको छ । स्थानीयवासीले सहयोग गरे अन्य स्थानको समेत बाटो निर्माण गरिने मगरले बताए।