एजेन्सी । भारतको युवाहरूको नेतृत्वमा रहेको ककरोच (साङ्लो) आन्दोलनका समर्थकहरूलाई सोमबार प्रहरीले लाठी प्रहार गरेको छ ।
अधिकारीहरूले अनुमति नदिए तापनि राजधानी नयाँ दिल्लीमा संसद् भवनतर्फ उनीहरूले विरोध र्याली निकाल्ने प्रयास गरेका थिए । केही महिना पुरानो यो आन्दोलन र नियोजित विरोध प्रदर्शनलाई प्रधानमन्त्री नरेन्द्र मोदीको तेस्रो कार्यकालको सबैभन्दा ठूलो सार्वजनिक चुनौतीका रूपमा हेरिएको छ । सामाजिक सञ्जालमा लाखौं समर्थकहरू बटुलेपछि यसले आफ्नो प्रभावलाई व्यापक बनाएको छ ।
भोक हडतालमा बसेका अभियन्ता सोनाम वाङचुकलाई शनिबार प्रहरीले जबर्जस्ती अस्पताल पुर्याउने निर्णय गरेपछि यो आन्दोलन थप चर्किएको छ । नयाँ दिल्लीको केन्द्रमा रहेको जन्तर मन्तरमा संसद्को मनसुन सत्रको पहिलो दिन र्यालीका लागि रातभरमा हजारौं समर्थकहरू भेला भएका थिए ।
दिल्ली प्रहरीले ककरोच जनता पार्टी (सीजेपी) का सदस्यहरूसँग बैठकहरू गरेको थियो । तर, हालसम्म कुनै सहमति हुन सकेको छैन । दिल्लीका डेपुटी कमिश्नर अफ पुलिस सचिन शर्माले रोयटर्सलाई बताए अनुसार, प्रदर्शन स्थलमा ठाउँको अभाव भइसकेको छ र यसले अप्रिय स्थिति निम्त्याउन सक्छ ।
उनले सोमबार बिहानसम्म करिब १० हजार प्रदर्शनकारीहरू उपस्थित रहेको जानकारी दिए ।
संसद् भवन नजिकै प्रदर्शनकारीहरू अगाडि बढेमा उत्पन्न हुन सक्ने तनावलाई मध्यनजर गर्दै ठूलो संख्यामा प्रहरी र अर्धसैनिक सुरक्षाकर्मीहरू तैनाथ गरिएको छ । टेलिभिजनका दृश्यहरूमा प्रहरीले कडा घेराबन्दी गरिएको क्षेत्रमा केही प्रदर्शनकारीहरूमाथि लाठीचार्ज गरेको देखाइएको छ ।
दिल्ली प्रहरीले बल प्रयोग गरिएको कुरालाई अस्वीकार गर्दै विरोध प्रदर्शनलाई व्यावसायिक रूपमा व्यवस्थापन गरिएको बताएको छ । वर्षा भइरहेको मध्य दिल्लीमा शान्तिपूर्ण रूपमा आइपुगेका प्रदर्शनकारीहरूले नाराबाजी गरिरहेका थिए ।
उनीहरूले हिन्दीमा शिक्षामन्त्री र प्रधानमन्त्रीलाई सम्बोधन गर्दै ‘धर्मेन्द्र प्रधान राजीनामा देऊ’ र ‘नरेन्द्र मोदी राजीनामा देऊ’ भन्दै नारा लगाएका थिए ।
सीजेपीका मुख्य प्रवक्ता सौरभ दासले एएनआई समाचार एजेन्सीलाई प्रशासनले सरकारसँग वार्ता सुरु गर्ने प्रयास गरिरहेको बताए । उनले प्रशासन निकै ढिलो आए तापनि प्रदर्शनकारीहरू वार्ताका लागि तयार रहेको उल्लेख गरे ।
गत मे महिनामा राष्ट्रिय मेडिकल प्रवेश परीक्षाको प्रश्नपत्र बाहिरिएपछि सीजेपी आन्दोलन सुरु भएको थियो । त्यस काण्डबाट २० लाखभन्दा बढी विद्यार्थीहरू प्रभावित भएका थिए र उनीहरूलाई पुनः परीक्षा दिन बाध्य पारिएको थियो ।
मेरठ शहरबाट आएका २१ वर्षीय विद्यार्थी आदि नाथनले सत्तामा रहेका नेताहरू अशिक्षित रहेको र प्रश्नपत्र चुहावट रोक्न आफू प्रदर्शनमा आएको बताए । उत्तर प्रदेशको अमरोहाबाट आएका २२ वर्षीय अर्का विद्यार्थी मोहम्मद ताब्रेजले परीक्षामा हुने भ्रष्टाचार र ठगी अन्त्य गर्न आफू यहाँ आएको उल्लेख गरे ।
सीजेपीले सुरुमा अनलाइन माध्यमबाट ठूलो समर्थन प्राप्त गरेको थियो र केही दिनमै इन्स्टाग्राममा २ करोड २० लाख अनुयायीहरू बटुलेको थियो तर अहिले यसलाई केही विपक्षी दलहरूले पनि समर्थन गरेका छन् ।
सीजेपीका संस्थापक अभिजित दिपके र उनका समर्थकहरूले गत महिनादेखि शिक्षामन्त्री प्रधानको राजीनामा माग्दै धर्ना सुरु गरेका थिए । वाङचुक जुन २८ मा उनीहरूसँग सामेल भई अनिश्चितकालीन भोक हडताल सुरु गरेका थिए ।
अस्पतालबाट आफ्नो एक्स खातामा पोस्ट गरिएको हस्तलिखित नोटमा वाङचुकले सरकारले शिक्षा प्रणालीका हालैका असफलता र प्रश्नपत्र चुहावटको जिम्मेवारी लिएमा वा प्रदर्शनकारीहरूलाई संसद्सम्म पुग्न अनुमति दिएमा आफ्नो अनशन तोड्ने बताएका छन् ।
उनको स्वास्थ्यले संसद्सम्म जान अनुमति नदिएमा विभिन्न दलका नेताहरूले अस्पतालमै आएर आश्वासन दिएमा पनि उनले अनशन अन्त्य गर्ने बताएका छन् ।
विश्लेषकहरूका अनुसार, सीजेपीको उदयले उच्च बेरोजगारी र बारम्बार हुने प्रश्नपत्र चुहावट जस्ता मुद्दाहरूमा भारतीय युवाहरूको आक्रोशलाई झल्काउँछ । सरकारी तथ्यांक अनुसार, सन् २०२५ मा १५ वर्षमाथिका व्यक्तिहरूमा बेरोजगारी दर ३.१ प्रतिशत थियो तर १५ देखि २९ वर्षका युवाहरूमा यो ९.९ प्रतिशत थियो ।
शहरी क्षेत्रमा यो दर १३.६ प्रतिशत र ग्रामीण क्षेत्रमा ८.३ प्रतिशत रहेको थियो ।
प्रतिक्रिया